Azərbaycanın üçrəngli Dövlət Bayrağı xalqımızın azadlıq arzularını, milli kimliyini və müstəqil dövlətçilik iradəsini özündə birləşdirən müqəddəs rəmzdir. Hər il noyabrın 9-da qeyd olunan Dövlət Bayrağı Günü bu müqəddəs dəyərə olan ehtiramın ifadəsidir. Bayrağımızın hər bir rəngi xalqımızın zəngin tarixini, mənəvi dünyasını və gələcəyə baxışını əks etdirir.
Üçrəngli bayrağımız ilk dəfə 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə qəbul edilmişdir. Bu hadisə Azərbaycan xalqının dövlətçilik tarixində mühüm mərhələ olmuşdur. Həmin dövrdə qəbul edilən bayraq müstəqilliyimizin, milli iradəmizin və azad yaşamaq istəyimizin rəmzinə çevrilmişdir.
Sovet hakimiyyəti illərində üçrəngli bayrağımız rəsmi dövlət rəmzi kimi istifadədən çıxarılsa da, xalqımızın yaddaşında və qəlbində yaşamağa davam etmişdir. Ulu Öndər Heydər Əliyevin təşəbbüsü ilə 1990-cı il noyabrın 17-də Naxçıvan Muxtar Respublikası Ali Məclisinin sessiyasında üçrəngli bayrağımız yenidən dövlət rəmzi kimi qəbul edilmişdir. Bu tarixi addım milli istiqlal mübarizəsinin mühüm mərhələlərindən biri olmuşdur.
1991-ci il fevralın 5-də Azərbaycan Respublikasının Ali Soveti üçrəngli bayrağı yenidən dövlət bayrağı kimi qəbul etmişdir. Müstəqilliyimizin bərpasından sonra isə bayrağımız dövlətçiliyimizin əsas atributlarından biri kimi öz layiqli yerini tutmuşdur. Azərbaycan Respublikasının Konstitusiyasında Dövlət Bayrağı ölkəmizin dövlət rəmzlərindən biri kimi təsbit edilmişdir.
Bu gün üçrəngli bayrağımız dünyanın müxtəlif ölkələrində, beynəlxalq təşkilatların qərargahlarında və Azərbaycanın azad edilmiş ərazilərində qürurla dalğalanır. Bayrağımızın yüksəldiyi hər bir məkan müstəqilliyimizin, suverenliyimizin və milli birliyimizin təntənəsidir. Dövlət Bayrağı Günü hər bir vətəndaşa bu müqəddəs rəmzi qorumağın və gələcək nəsillərə ötürməyin vacibliyini xatırladır.
Nahidə Rzayeva,
YAP Nizami rayon təşkilatının “Keşlə qəsəbəsi, Köndələn küçəsi” ərazi partiya təşkilatının sədr müavini
