İşğaldan azad edilmiş ərazilərin bərpasında nəqliyyat infrastrukturunun yaradılması xüsusi əhəmiyyət daşıyır. Yollar yaşayış məntəqələrini birləşdirir, insanların hərəkətini asanlaşdırır, tikinti və təsərrüfat işlərinin aparılmasına şərait yaradır, eyni zamanda iqtisadi əlaqələrin genişlənməsi üçün əsas rolunu oynayır. Füzuli rayonunda həyata keçirilən yol və hava nəqliyyatı layihələri də məhz bu məqsədlərə xidmət edir. Prezident, Müzəffər Ali Baş Komandan İlham Əliyevin 2020-ci ilin noyabrından başlayaraq Füzuliyə etdiyi səfərlər zamanı nəqliyyat layihələrinin təməlinin qoyulması və tikinti işlərinin gedişi ilə tanış olması bu sahənin dövlətin bərpa siyasətində mühüm yer tutduğunu göstərir.
2020-ci il noyabrın 16-da Füzuli-Şuşa avtomobil yolunun təməlinin qoyulması azad edilmiş ərazilərdə nəqliyyat əlaqələrinin yenidən qurulması istiqamətində ilk mühüm addımlardan biri oldu. Zəfər yolu adlandırılan bu yol Füzuli ilə Şuşa arasında əlaqələrin qurulmasına, Qarabağın digər ərazilərinə gediş-gəlişin asanlaşdırılmasına və bölgədə həyata keçirilən bərpa tədbirlərinin sürətləndirilməsinə xidmət edən layihə kimi xüsusi əhəmiyyət qazandı. Yolun inşası azad edilmiş torpaqlarda quruculuq işlərinin başlanması ilə yanaşı, həmin ərazilərin gələcək iqtisadi və sosial həyatının formalaşdırılması üçün də zəruri idi.
2021-ci il yanvarın 14-də Əhmədbəyli-Füzuli-Şuşa avtomobil yolunun 27-ci kilometrində Füzuli-Şuşa yolunun və Füzuli rayonunda beynəlxalq hava limanının təməllərinin qoyulması nəqliyyat infrastrukturunun daha geniş miqyasda qurulmasına başlanıldığını göstərdi. Avtomobil yolları rayonlar və yaşayış məntəqələri arasında əlaqələri möhkəmləndirdiyi halda, hava limanı bölgənin hava nəqliyyatı imkanlarını genişləndirmək üçün nəzərdə tutulurdu. Belə layihələrin paralel şəkildə həyata keçirilməsi nəqliyyat əlaqələrinin müxtəlif istiqamətlər üzrə inkişaf etdirilməsinə şərait yaradır.
Fevralın 14-də Prezident İlham Əliyev Horadiz-Ağbənd və Ağdam-Füzuli avtomobil yollarının inşası ilə tanış oldu. Martın 15-də isə Füzuli-Hadrut avtomobil yolunun təməli qoyuldu. Bu layihələr Füzulinin yalnız bir istiqamətdə deyil, ətraf ərazilərlə əlaqəli vahid nəqliyyat şəbəkəsinin tərkib hissəsi kimi inkişaf etdirilməsinə yönəlmişdi. Yolların qurulması tikinti materiallarının daşınması, yeni infrastruktur obyektlərinin inşası və gələcəkdə yaşayış məntəqələri arasında gediş-gəlişin təmin edilməsi baxımından mühüm rol oynayır.
İyunun 14-də dövlət başçısı Əhmədbəyli-Füzuli-Şuşa avtomobil yolunda və Zəfər yolunda görülən işlərlə tanış oldu. Avqustun 29-da isə Zəfər yolunda son tamamlama işlərinin gedişini nəzərdən keçirdi və Füzuli Beynəlxalq Hava Limanında tikinti prosesinin vəziyyəti ilə maraqlandı. Həmin səfərlər zamanı layihələrin gedişinin diqqətdə saxlanılması nəqliyyat infrastrukturunun qısa müddətdə istifadəyə hazırlanması və azad edilmiş ərazilərin əlçatanlığının artırılması baxımından əhəmiyyətli idi.
Füzuli Beynəlxalq Hava Limanının inşası rayonun inkişaf tarixində xüsusi yer tutur. Hava limanı insanların bölgəyə səfərlərini asanlaşdırmaqla yanaşı, müxtəlif sahələrdə əlaqələrin genişlənməsi üçün də əlavə imkanlar yaradır. Nəqliyyat obyektlərinin inkişafı iqtisadi fəaliyyətin canlanmasına, xidmət sahələrinin genişlənməsinə və gələcəkdə bölgəyə yönələn səfərlərin artmasına şərait yarada bilər. Bununla yanaşı, yol şəbəkəsinin inkişafı şəhərin ətraf yaşayış məntəqələri ilə əlaqələrinin möhkəmlənməsi üçün də vacibdir.
2021-ci il oktyabrın 17-də Füzuli-Ağdam avtomobil yolunun təməlinin qoyulması bölgədə nəqliyyat layihələrinin davam etdirildiyini göstərdi. Bu yolun inşası Füzuli və Ağdam arasında əlaqələrin inkişafı, ərazilərin iqtisadi baxımdan bir-birini tamamlaması və regional nəqliyyat imkanlarının genişləndirilməsi baxımından əhəmiyyət daşıyırdı. Füzulidə həyata keçirilən yol layihələri bir-biri ilə əlaqəli şəkildə qiymətləndirildikdə onların bölgənin gələcək inkişafı üçün vahid infrastruktur əsasını formalaşdırdığı aydın görünür.
Nəqliyyat infrastrukturunun qurulması Füzulinin bərpasının yalnız texniki tərəfi deyil. Yollar insanların doğma yurda qayıtmasını, yeni yaşayış məntəqələrinin formalaşmasını, iqtisadi fəaliyyətin genişlənməsini və sosial əlaqələrin bərpasını dəstəkləyir. Prezident İlham Əliyevin səfərləri zamanı bu layihələrə göstərilən diqqət Füzulinin gələcək inkişafının planlı şəkildə təşkil olunmasına yönəlmiş dövlət siyasətinin mühüm tərkib hissəsidir. Bu gün Füzulidə yaradılan nəqliyyat imkanları bölgənin ölkənin ümumi iqtisadi və sosial həyatına daha sıx inteqrasiyası üçün mühüm zəmin formalaşdırır.
Ləman Məmmədli,
YAP Xətai rayon təşkilatı fəalı
