Azərbaycanın üçrəngli Dövlət Bayrağı xalqımızın qəhrəmanlıq tarixini, müstəqillik uğrunda mübarizəsini və milli qürurunu özündə yaşadan müqəddəs rəmzdir. Bu bayrağa baxdıqda yalnız rənglərin harmoniyasını deyil, həm də bir xalqın azadlıq arzularını, əzmkarlığını və sarsılmaz iradəsini görürük. Tariximizin müxtəlif dövrlərində xalqımız ağır sınaqlarla üzləşsə də, milli kimliyini, dilini, mədəniyyətini və dövlətçilik düşüncəsini qoruyub saxlamağı bacarmışdır. Üçrəngli bayrağımız bütün bu dəyərlərin vahid simvolu kimi bu gün də qürurla dalğalanır. 9 Noyabr – Dövlət Bayrağı Günü milli yaddaşımızın, dövlətçilik ənənələrimizin və Vətən sevgimizin təntənəsidir.
Azərbaycan Xalq Cümhuriyyəti 1918-ci ildə müstəqil dövlət quraraq xalqımızın çoxəsrlik dövlətçilik ənənələrini yeni mərhələyə yüksəltdi. Noyabrın 9-da qəbul edilən üçrəngli bayraq milli ideologiyamızın əsas ifadəsinə çevrildi. Bu bayrağın hər rəngi xalqımızın dünyagörüşünü, tarixi mənsubiyyətini və inkişaf yolunu əks etdirirdi. Cümhuriyyətin süqutundan sonra uzun illər milli bayrağımızın rəsmi dövlət atributu kimi istifadəsi mümkün olmasa da, onun mənəvi dəyəri xalqımızın yaddaşında yaşadı. Ümummilli Lider Heydər Əliyevin tarixi təşəbbüsləri nəticəsində üçrəngli bayrağımız yenidən dövlətçilik həyatımıza qaytarıldı və müstəqilliyimizin rəmzinə çevrildi.
Azərbaycanın müasir tarixində ən şanlı səhifələrdən biri 2020-ci ildə qazanılmış Vətən müharibəsi Zəfəridir. 44 gün davam edən müharibə zamanı Azərbaycan Ordusu öz qəhrəmanlığı, peşəkarlığı və yüksək döyüş ruhu ilə tarixi missiyanı yerinə yetirdi. Ali Baş Komandan İlham Əliyevin rəhbərliyi ilə əldə edilən Qələbə xalqımızın uzun illər davam edən həsrətinə son qoydu. Şuşada dalğalanan üçrəngli bayrağımız hər bir azərbaycanlının qəlbində unudulmaz hisslər oyatdı. 2023-cü ildə ölkəmizin suverenliyinin tam bərpası isə bu tarixi Zəfərin məntiqi davamı oldu. Bu gün bayrağımızın azad edilmiş ərazilərdə dalğalanması şəhidlərimizin qanının yerdə qalmadığının, xalqımızın əzminin və dövlətimizin gücünün ifadəsidir.
Qəhrəmanlıq tariximizi yaşatmaq, şəhidlərimizin xatirəsini uca tutmaq və dövlət rəmzlərimizə hörmətlə yanaşmaq hər birimizin mənəvi borcudur. Dövlət Bayrağı Günü gənc nəslə milli ruhun, vətənpərvərlik hissinin və dövlətə sədaqətin aşılanması baxımından mühüm əhəmiyyət daşıyır. Bayrağımızın dalğalandığı hər bir yerdə Azərbaycanın adı, tarixi və milli qüruru yaşayır. Biz bu bayrağı yalnız əlimizdə deyil, qəlbimizdə də daşımalı, onun ifadə etdiyi dəyərləri gündəlik həyatımızda yaşatmalıyıq. Üçrəngli bayrağımız daim uca olsun, Azərbaycanımızın qüdrəti və şöhrəti nəsillərdən-nəsillərə ötürülsün!
Tural İsmayılov,
YAP Xəzər rayon təşkilatının fəalı
