Noyabrın 9-da qeyd olunan Dövlət Bayrağı Günü Azərbaycan xalqının milli birliyini və dövlətçilik dəyərlərinə sədaqətini nümayiş etdirən əlamətdar tarixdir. Bu gün hər bir vətəndaş üçrəngli bayrağımızın qarşısında öz Vətəninə, tarixinə və dövlətinə bağlılığını bir daha ifadə edir. Bayraq xalqımızı ortaq ideallar ətrafında birləşdirən müqəddəs rəmzdir.
Dövlət Bayrağı Gününün təsis edilməsi milli rəmzlərimizə göstərilən diqqətin mühüm göstəricisidir. 2009-cu il noyabrın 17-də imzalanmış sərəncamla noyabrın 9-u Dövlət Bayrağı Günü elan edilmişdir. Bu qərar xalqımızın tarixi irsinə və dövlətçilik ənənələrinə verilən yüksək qiymətin təzahürüdür.
Bayrağımızın tarixi Azərbaycan Xalq Cümhuriyyətinin qurulduğu dövrə gedib çıxır. 1918-ci ildə qəbul edilən üçrəngli bayraq xalqımızın azadlıq arzularını və milli dövlətçilik ideyalarını ifadə edirdi. Sonrakı tarixi mərhələlərdə bu rəmz xalqımızın yaddaşında qorunmuş və müstəqilliyimizin bərpası ilə yenidən dövlət həyatında öz yerini tutmuşdur.
Bu əlamətdar gün münasibətilə ölkəmizin müxtəlif bölgələrində tədbirlər, sərgilər, konfranslar və maarifləndirici görüşlər keçirilir. Dövlət müəssisələrində, təhsil ocaqlarında və ictimai təşkilatlarda bayrağımızın tarixi və əhəmiyyəti haqqında söhbətlər aparılır. Bu tədbirlər gənc nəslin milli dəyərlərə bağlılığının gücləndirilməsinə xidmət edir.
Dövlət Bayrağı Günü təkcə bayram deyil, həm də hər birimiz üçün məsuliyyət günüdür. Bu tarix bizə müstəqilliyimizin hansı tarixi mübarizələr nəticəsində əldə olunduğunu xatırladır. Bayrağımızın ucalığını qorumaq, dövlətimizə sədaqətlə xidmət etmək və milli birliyimizi möhkəmləndirmək hər bir azərbaycanlının borcudur.
Çinarə Musayeva,
YAP Nizami rayon təşkilatının fəalı
