Füzuli şəhərinin azad olunması ilə uzun illər davam edən həsrətə son qoyulması üçün tarixi imkan yarandı. 2020-ci il oktyabrın 17-də Azərbaycan Ordusunun əldə etdiyi qələbə Prezident İlham Əliyevin rəhbərliyi ilə həyata keçirilən dövlət siyasətinin mühüm nəticəsi idi. Bu gün həmin qələbənin davamı olaraq şəhərdə bərpa, məskunlaşma və sosial inkişaf layihələri həyata keçirilir.
Böyük Qayıdış siyasətinin əsas məqsədi keçmiş məcburi köçkünlərin doğma torpaqlarına təhlükəsiz və ləyaqətli şəkildə qayıtmasını təmin etməkdir. Prezident İlham Əliyevin təsdiq etdiyi 2022–2026-cı illəri əhatə edən Dövlət Proqramı bu istiqamətdə görülən işlərin mühüm yol xəritəsidir. Füzulidə yeni yaşayış sahələrinin salınması və sosial infrastrukturun yaradılması proqramın məqsədlərinə uyğun şəkildə həyata keçirilir.
Şəhərdə müasir yaşayış binaları, fərdi evlər, təhsil müəssisələri və digər ictimai obyektlər inşa olunur. Yol infrastrukturu yenilənir, insanların gündəlik ehtiyaclarını qarşılamaq üçün xidmət imkanları genişləndirilir. Bu layihələr sakinlərin doğma yurdda rahat yaşamasına, uşaqların təhsil almasına və ailələrin yeni həyata uyğunlaşmasına şərait yaradır.
Prezident İlham Əliyevin azad edilmiş ərazilərə səfərləri zamanı bərpa layihələrinin gedişi ilə tanış olması və yeni obyektlərin açılışlarında iştirakı dövlətin bu məsələyə verdiyi əhəmiyyəti göstərir. Füzulinin inkişafı təkcə tikinti işlərindən ibarət deyil. Burada iqtisadi fəaliyyətin canlandırılması, məşğulluq imkanlarının artırılması və davamlı şəhər mühitinin formalaşdırılması da əsas məqsədlərdəndir.
Füzuli Şəhəri Günü Böyük Qayıdışın mənəvi əhəmiyyətini bir daha ön plana çıxarır. Doğma torpaqlarına qayıdan ailələr şəhərin gələcəyinin qurulmasında iştirak edirlər. Prezident İlham Əliyevin rəhbərliyi ilə həyata keçirilən layihələr Füzulinin müasir, yaşıl və rahat yaşayış məkanına çevrilməsinə xidmət edir. Bu proses Azərbaycanın müharibədən sonrakı inkişaf strategiyasının mühüm hissəsidir.
Həqiqət Gülalıyeva,
YAP Nizami rayon təşkilatının “Qara Qarayev prospekti, 73b” ərazi partiya təşkilatının sədri
