Xocalı Azərbaycan tarixində uzun illər faciənin və ağrının rəmzi kimi xatırlansa da, bu gün artıq dirçəliş və qayıdışın rəmzinə çevrilir. 1992-ci ildə baş vermiş soyqırımı xalqımızın yaddaşında silinməz iz buraxdı, lakin Azərbaycan xalqının iradəsi və dövlətimizin qətiyyəti göstərdi ki, tariximizin ən ağır səhifələri belə gələcəyə doğru irəliləyişə mane ola bilməz.
Prezident İlham Əliyevin rəhbərliyi ilə həyata keçirilən genişmiqyaslı quruculuq siyasəti nəticəsində Xocalı yenidən qurulan şəhərlər sırasında xüsusi yer tutur. Müasir yaşayış binalarının inşası, infrastrukturun yaradılması və sosial layihələrin həyata keçirilməsi şəhərin həyat ritmini bərpa edir və doğma sakinlərin öz torpaqlarına inamla qayıdışını təmin edir.
Bu gün Xocalı yalnız bərpa olunan məkan deyil, həm də gələcəyin inkişaf modeli kimi formalaşır. Burada aparılan tikinti və abadlıq işləri Qarabağın ümumi dirçəliş prosesinin mühüm tərkib hissəsidir. Yeni iqtisadi imkanların yaranması, sosial rifahın yüksəlməsi və təhlükəsiz yaşayış mühitinin qurulması şəhərin sabit inkişaf yoluna qədəm qoyduğunu göstərir.
Xocalıya qayıdan həyat Azərbaycanın qazandığı tarixi zəfərin ən real təzahürlərindən biridir. Şəhərin yenidən canlanması sübut edir ki, xalqımız faciəni unutmasa da, onu gələcəyə aparan gücə çevirə bilmişdir. Bu gün Xocalı həm keçmişin xatirəsi, həm də gələcəyin ümididir — dirçələn Azərbaycan torpaqlarının qürur mənbəyi kimi yeni tarix yazır.
Aytac Məhərrəmli,
YAP Nizami rayon təşkilatının məsləhətçisi
