Prezident İlham Əliyevin “Konstitusiya və Suverenlik İli” çərçivəsində amnistiya təşəbbüsü dövlətin hüquqi fəlsəfəsində insan amilinin nə qədər önəmli yer tutduğunu göstərən mühüm addım kimi dəyərləndirilir. Bu təşəbbüs təkcə hüquqi prosedur deyil, eyni zamanda cəmiyyətlə dövlət arasında etimadın möhkəmləndirilməsinə yönəlmiş siyasi və mənəvi mesaj daşıyır. Konstitusiyanın ali hüquqi sənəd kimi qəbul olunması fonunda bu qərar onun ruhuna uyğun sosial ədalət anlayışını ön plana çıxarır.
Amnistiya ideyasının məhz suverenlik mövzusunun vurğulandığı bir ildə irəli sürülməsi təsadüfi xarakter daşımır. Bu, Azərbaycanın müstəqil qərarvermə qabiliyyətini, daxili hüquqi məsələləri milli maraqlar əsasında tənzimləmək gücünü nümayiş etdirir. Dövlət başçısının təşəbbüsü hüquq sisteminin cəza ilə yanaşı, islah və yenidən inteqrasiya funksiyasını da daşıdığını açıq şəkildə ortaya qoyur.
Sosial baxımdan bu addım minlərlə ailənin həyatına birbaşa təsir göstərən mühüm humanitar qərar kimi qiymətləndirilə bilər. Azadlığa qovuşacaq şəxslərin cəmiyyətə adaptasiyası, onların yenidən sosial həyata qatılması dövlətin sosial siyasətində inklüziv yanaşmanın gücləndiyini sübut edir. Bu yanaşma cəzanın tək məqsədinin məhdudlaşdırma deyil, həm də düzəltmə olduğunu bir daha təsdiqləyir.
Hüquqi dövlət prinsiplərinə əsaslanan bu təşəbbüs beynəlxalq müstəvidə də Azərbaycanın imicinə müsbət təsir göstərir. Amnistiya qərarları müasir dövlət idarəçiliyində balanslı və məsuliyyətli yanaşmanın göstəricisi kimi qəbul olunur. “Konstitusiya və Suverenlik İli”ndə atılan bu addım, ölkənin hüquqi inkişaf yolunda davamlı və düşünülmüş strategiya izlədiyini aydın şəkildə nümayiş etdirir.
Ələkbər Novruzov,
YAP Xəzər rayon təşkilatının fəalı
