“Düşünürəm ki, bu səfər olduqca uyğun və münasib zamanda həyata keçirilir”.
Gundemws.az xəbər verir ki, bunu İranın xarici işlər naziri Seyid Abbas Araqçı Bakıda Azərbaycan XİN rəhbəri Ceyhun Bayramovla birgə mətbuat konfransında deyib.
“Bu gün cənab Prezident İlham Əliyevlə olduqca dəyərli və faydalı söhbət apardıq. Cənab Prezidentə bizə vaxt ayırdığı üçün təşəkkürümü bildirirəm. Azərbaycanla İran arasında danışıqlar hər zaman açıq, mehriban və dostcasına olmuşdur. Burada, əlbəttə, bəzi fikir ayrılıqları, anlaşılmazlıq ola bilər. Bunlar isə məhz danışıqlar vasitəsilə aradan qaldırıla bilən məsələlərdir”.
O, İran Prezidenti Məsud Peşezkianın Azərbaycana iki səfərinin həyata keçirildiyini xatırladıb: “Prezident İlham Əliyevi Tehranda qarşılamağa hazırıq. Cənab Ceyhun Bayramovu da ölkəmizdə gözləyirik. Biz əlbəttə müxtəlif təşkilatlar çərçivəsində, müxtəlif yerlərdə görüşürük, lakin Tehrana gəlişinizdən çox sevinərik.
Azərbaycanla münasibətləri artırmaq istəyirik. Bu əlaqələr nə qədər çox olarsa, iki ölkə vətəndaşları arasında get-gəl nə qədər çox olarsa, ticari iqtisadi məsələlər də o qədər çox vüsət alar”
