2003-cü ildə Azərbaycan xalqının etimadını qazanaraq Prezident seçilən Cənab İlham Əliyev, müstəqil Azərbaycanın inkişafında mühüm səhifələr açmışdır. İlk gündən o, ölkəmizi modernləşdirmək, beynəlxalq aləmdə mövqeyini gücləndirmək və xalqın rifahını artırmaq məqsədi ilə mühüm islahatlar həyata keçirmişdir. Prezidentin uzaqgörən siyasəti Azərbaycanın siyasi, iqtisadi və sosial sahələrdə böyük nailiyyətlər əldə etməsinə şərait yaratmışdır. Onun rəhbərliyi ilə Azərbaycanın enerji strategiyası genişlənmiş, Bakı-Tbilisi-Ceyhan və Bakı-Tbilisi-Ərzurum neft-qaz kəmərləri kimi tarixi layihələr həyata keçirilmişdir. Bu layihələr Azərbaycanı dünyanın enerji təhlükəsizliyində strateji ölkəyə çevirmiş, milli iqtisadiyyata böyük həcmdə gəlir gətirmişdir. Prezident İlham Əliyev milli maraqların qorunması və Azərbaycanın suverenliyinin gücləndirilməsini daim prioritet hesab etmişdir.
Ordunun modernləşdirilməsi və döyüş qabiliyyətinin artırılması məqsədilə həyata keçirilən tədbirlər nəticəsində Silahlı Qüvvələrimiz regionun ən güclü ordularından birinə çevrilmişdir. Bu siyasətin ən parlaq nümunəsi 2020-ci ildə 44 günlük Vətən müharibəsi olmuşdur. Azərbaycanın ərazi bütövlüyünün bərpa edilməsi xalqımızın illərlə gözlədiyi tarixi ədalətin bərpası kimi qiymətləndirilir. Qarabağın işğaldan azad edilməsi ilə ölkəmizdə yeni inkişaf mərhələsi başlanmışdır. Azad olunmuş torpaqlarda genişmiqyaslı bərpa və yenidənqurma işləri aparılır. Füzuli, Zəngilan, Laçın və digər bölgələrdə hava limanlarının tikilməsi, “ağıllı kənd” layihələrinin icrası, yol infrastrukturunun yenidən qurulması bu ərazilərin dirçəlməsi istiqamətində atılmış mühüm addımlardır. Prezident İlham Əliyevin dediyi kimi, “Biz Qarabağı cənnətə çevirəcəyik”. Cənab Prezident regional inkişaf proqramları ilə ölkənin hər bir bölgəsinin iqtisadi potensialını artırmağa nail olmuşdur. Rayonlarda yeni sənaye müəssisələrinin yaradılması, kənd təsərrüfatının inkişafı, turizmin genişləndirilməsi və kənd yerlərinin abadlaşdırılması ölkəmizin hərtərəfli inkişafına xidmət etmişdir. Bu tədbirlər həm regionlarda, həm də ümumilikdə ölkədə məşğulluğun artırılmasına, əhalinin sosial rifahının yüksəlməsinə səbəb olmuşdur. Prezident İlham Əliyev həmçinin ölkə daxilində sosial islahatlara xüsusi diqqət yetirmişdir. Təhsil, səhiyyə, idman və mədəniyyət sahələrində icra edilən layihələr xalqın rifahını artırmağa xidmət etmişdir. Şəhid ailələri və qazilər üçün sosial təminat proqramlarının genişləndirilməsi, aztəminatlı ailələrə dövlət dəstəyinin artırılması və mənzil təminatı sahəsində görülən işlər bu diqqətin ən yaxşı nümunəsidir. Prezident İlham Əliyevin rəhbərliyi ilə Azərbaycan mədəniyyətinin və irsinin qorunub saxlanılması istiqamətində də əhəmiyyətli işlər görülmüşdür. Qarabağda məscidlərin, abidələrin bərpası və milli mədəniyyətimizin dünyada tanıdılması bu sahədə mühüm nailiyyətlərdir. Prezidentin təşəbbüsü ilə Azərbaycanda rəqəmsal iqtisadiyyatın inkişafı üçün mühüm islahatlar həyata keçirilmişdir. Bu addımlar innovativ texnologiyaların tətbiqi və iqtisadiyyatın rəqabətqabiliyyətinin artırılmasına xidmət etmişdir. Rəqəmsallaşma, logistika və informasiya texnologiyaları sahəsində əldə edilən nailiyyətlər Azərbaycanın müasir texnologiyalar dövründə ön sıralarda yer almasını təmin etmişdir. Xalqın rifahını artırmaq üçün müasir sosial müdafiə mexanizmləri yaradılmış və pensiya islahatları ilə yaşlı nəslin həyat şəraitinin yaxşılaşdırılması təmin olunmuşdur.
Cənab İlham Əliyev həmçinin gənclərin inkişafına xüsusi diqqət ayıraraq, onların müasir təhsil və iş imkanları ilə təmin edilməsini prioritet hesab etmişdir. Azərbaycanın beynəlxalq idman tədbirlərinə ev sahibliyi etməsi də ölkəmizin dünyada tanınmasına və turizmin inkişafına əvəzsiz töhfə vermişdir. Azərbaycan xalqı onun rəhbərliyində ölkənin inkişafına olan inamını heç vaxt itirməmiş və Prezident İlham Əliyevin ölkəmizin gələcəyi üçün atdığı hər bir addımı dəstəkləmişdir. Prezident İlham Əliyev Azərbaycanın gələcəyini düşünərək xalqın dəstəyi ilə yeni hədəflərə doğru inamla irəliləyir.
Sahil Əliyev,
YAP-ın gənc fəalı
