Zəngilan rayonu Azərbaycan üçün strateji və tarixi əhəmiyyətə malikdir. 2020-ci il Vətən müharibəsi zamanı Azərbaycan Silahlı Qüvvələrinin qəhrəman əməliyyatları nəticəsində rayon işğaldan azad edildi. Prezident İlham Əliyevin rəhbərliyi ilə aparılan döyüşlər Zəngilanın hərbi və inzibati önəmini bir daha göstərdi.
Azadlıqdan sonra rayonun bərpası və inkişafı istiqamətində “Böyük Qayıdış” layihəsi çərçivəsində geniş işlər aparıldı. Ağalı kəndində 200 ev, məktəb, bağça, tibb məntəqəsi və “ASAN” mərkəzi istifadəyə verildi. Kənddə enerji, su və internet təminatı müasir texnologiyalarla təmin olunmuş, ekoloji və dayanıqlı infrastruktur yaradılmışdır.
Zəngilan şəhərində Beynəlxalq Hava Limanı və Horadiz-Zəngilan-Ağbənd dəmir yolu tikilir, həmçinin tarixi və dini abidələrin bərpası işləri sürətlə davam etdirilir. Kənd təsərrüfatında “Dost Aqropark” layihəsi reallaşdırılır və minlərlə sakin işlə təmin olunacaq.
Prezident İlham Əliyevin Zəngilana səfərləri və layihələrin icrası rayonun sürətli inkişafına, turizm və iqtisadi potensialın artmasına böyük töhfə verir. 20 oktyabr Zəngilan şəhəri günü olaraq təsis edilmiş və rayon müasir inkişaf mərhələsinə qədəm qoymuşdur.
Aytac Məhərrəmli,
YAP Nizami rayon təşkilatının məsləhətçisi
