17 oktyabr tarixi Azərbaycan xalqının qəlbində əbədi iz qoyan qürur günüdür. Bu gün 2020-ci ildə qəhrəman Azərbaycan Ordusu tərəfindən Füzuli şəhərinin işğaldan azad olunması ilə tarixə düşdü. Uzun illər düşmən tapdağı altında qalan bu qədim şəhərin azadlığı həm torpaqlarımızın bərpası, həm də milli birliyimizin təntənəsi oldu. Həmin günün sevinci bütün Azərbaycanı birləşdirdi, hər kəsin qəlbində “Zəfər bizimdir” duyğusu əbədi olaraq yer etdi.
Füzuli şəhəri Qarabağ müharibəsinin simvoluna çevrildi. Onun azadlığı uğrunda gedən döyüşlər Azərbaycan əsgərinin cəsarətini, peşəkarlığını və vətənə sədaqətini bir daha dünyaya göstərdi. Füzuli uğrunda qazanılan qələbə düşmənin illərlə qurduğu müdafiə səddini darmadağın etdi və digər şəhərlərin azad olunması üçün yol açdı. Bu hadisə həm hərbi, həm də mənəvi baxımdan tarixi əhəmiyyət daşıyır.
Bu gün Füzuli yenidən doğulur. Qısa müddətdə burada bərpa işləri aparılmış, infrastruktur yenilənmiş, müasir şəhər konsepsiyası həyata keçirilmişdir. Füzuli beynəlxalq hava limanının açılması bu şəhərin yenidən regionun iqtisadi və nəqliyyat mərkəzinə çevriləcəyini göstərir. Artıq həyat bu torpaqlarda yenidən canlanır, insanlar doğma yurdlarına qayıdır.
17 oktyabr indi təkcə bir şəhərin azadlıq tarixi deyil, həm də xalqın sarsılmaz iradəsinin rəmzidir. Hər il bu gün Füzuli şəhəri günü kimi qeyd olunur və bu tarix gələcək nəsillərə azadlıq, mübarizə və qürur dərsi kimi çatdırılır.
YAP Xəzər rayon təşkilatının fəalı
Nigar Cəlalova
