Azərbaycan Respublikasının müstəqilliyinin elan edildiyi 1991-ci ildən etibarən, ordu quruculuğu ölkənin təhlükəsizliyini təmin etmək və ərazi bütövlüyünü qorumaq baxımından mühüm prioritetə çevrilmişdir. 1990-cı illərin əvvəllərində, müstəqillik dönəmindəki ilk illərdə Azərbaycan bir sıra daxili və xarici çətinliklərlə qarşılaşmış, ən ağır zərbələrdən birini 1992-1994-cü illər arasında işğal edilmiş ərazilərini geri almaq uğrunda mübarizədə almışdır. Bu dövrün sonunda əldə olunan ağır məğlubiyyət, Azərbaycan xalqını və dövlətini yeni bir ordu quruculuğu siyasətinə sövq etmişdir. Bu prosesdə müstəsna rolu olan prezident İlham Əliyev, 2003-cü ildən etibarən ordu quruculuğunu milli təhlükəsizliyin əsas dayağı olaraq müəyyənləşdirərək, Azərbaycanın ordusunu dünyanın ən güclü 50 ordusu sırasına çıxarmışdır. 2020-ci ildəki Vətən müharibəsi, Azərbaycanın həyata keçirdiyi ordu quruculuğunun ən parlaq nəticəsi olmuş, torpaqlarımızın işğaldan azad edilməsi ilə Azərbaycan Silahlı Qüvvələri həm beynəlxalq aləmdə, həm də öz xalqı arasında böyük nüfuz qazanmışdır.
Azərbaycanın ordu quruculuğu sahəsindəki ilk ciddi addımlarını Ümummilli Lider Heydər Əliyev atmışdır. 1993-cü ildə Heydər Əliyevin hakimiyyətə gəlməsi ilə ölkə iqtisadiyyatı və təhlükəsizliyi sahəsində müstəqilliyin qorunması və inkişafı məqsədilə mühüm islahatlar başlandı. Azərbaycan Silahlı Qüvvələrinin gücləndirilməsi, orduya peşəkar hərbi kadrların cəlb edilməsi, texniki avadanlıqların yenilənməsi və müasir döyüş üsullarının tətbiqi bu islahatların başlıca istiqamətləri idi. Uğurlu ordu quruculuğu sahəsində Heydər Əliyev tərəfindən müəyyən edilmiş strateji kurs, Azərbaycanı regional təhlükəsizlikdə əsas oyunçuya çevirdi. Bu dövr ərzində orduya nəzərdə tutulan büdcə xərcləri artırıldı, hərbi tədris müəssisələrinin fəaliyyəti gücləndirildi və orduya yüksək səviyyəli komandirlər gətirildi.
2003-cü ildən sonra, Prezident İlham Əliyev tərəfindən həyata keçirilən ordu quruculuğu siyasəti, əvvəlki dövrün təcrübələrini daha da inkişaf etdirərək, Azərbaycanın Silahlı Qüvvələrini yeni bir mərhələyə daşıdı. Prezident İlham Əliyev, ordu quruculuğunu dövlət siyasətinin ən vacib prioritetlərindən biri olaraq müəyyənləşdirərək, bu sahəyə ciddi investisiyalar qoymağa başladı. Bu siyasətin əsas istiqamətləri arasında Silahlı Qüvvələrin maddi-texniki bazasının yenilənməsi, hərbi sənayenin inkişafı, ordunun müasir döyüş texnikaları ilə təchiz edilməsi və şəxsi heyətin sosial təminatının yaxşılaşdırılması yer alır.
Azərbaycan Silahlı Qüvvələri 2000-ci illərin əvvəllərində ciddi bir təchizat islahatı keçirdi. Orduya yeni nəsil zirehli texnika, pilotsuz uçuş aparatları (PUA), müasir döyüş sursatları və atıcı silahlar daxil edildi. 2005-ci ildən başlayaraq, ölkə daxilində hərbi sənaye sahəsinin inkişafına xüsusi diqqət yetirildi. Bu sahənin inkişafı nəticəsində Azərbaycanda müxtəlif növ hərbi texnika və silahların istehsalı mümkün oldu və bu, ordunun xarici ölkələrdən asılılığını azaldaraq, yerli istehsalatı artırdı. Azərbaycanın müdafiə sənayesi son illərdə sürətlə inkişaf etdi və bir sıra hərbi texnikaların, zirehli maşınların və pilotsuz uçuş aparatlarının yerli istehsalına başlandı. Bununla yanaşı, silahlı qüvvələrin döyüş hazırlığının yüksəldilməsi məqsədilə, orduda daimi təlimlər və mütəmadi olaraq hərbi hazırlıq keçirildi. Azərbaycanın istehsal etdiyi texnika ilə ordunun təchiz edilməsi, ölkənin təhlükəsizlik sahəsində müstəqil və güclü olmasına imkan yaratdı.
Ölkəmizin 2020-ci ildəki Vətən Müharibəsində əldə etdiyi böyük qələbə, ordu quruculuğu sahəsindəki uğurların ən parlaq nümunəsidir. 44 gün davam edən müharibə, Azərbaycanın milli müdafiə qüdrətinin göstəricisi oldu. Müzəffər Ali Baş Komandan İlham Əliyevin rəhbərliyi altında Azərbaycan Silahlı Qüvvələri, yüksək təcrübə və peşəkarlıqla, ən müasir hərbi texnikalardan istifadə edərək düşməni məğlub etdi. Bu qələbə, Azərbaycanın ordu quruculuğunda doğru yolda olduğunu, xalqın birliyinin və dövlətin qüdrətinin nəticəsi olduğunu təsdiqlədi. Dövlətimizin ordu quruculuğunda əldə etdiyi nailiyyətlər gələcəkdə daha da inkişaf etdirilməli və yeni hədəflər müəyyən edilməlidir. Ordunun döyüş hazırlığı, müasir texnikalarla təchizatı, kadr potensialının inkişafı, regional və beynəlxalq təhlükəsizlik məsələlərinə daha fəal qatılmaq kimi məsələlər bu hədəflərin başında durur. Gələcəkdə Azərbaycanın müdafiə sənayesi daha da inkişaf edərək, ölkənin regional və qlobal təhlükəsizliyə daha müstəqil və güclü töhfələr verməsi gözlənilir.
Azərbaycanın ordusunun qurulması, inkişafı və Vətən müharibəsindəki qələbəsi, həm milli, həm də beynəlxalq aləmdə böyük əhəmiyyət kəsb edir. 2003-cü ildən etibarən Prezident İlham Əliyevin rəhbərliyi ilə həyata keçirilən ordu quruculuğu siyasəti, Azərbaycanın ərazi bütövlüyünü təmin etmək və milli təhlükəsizliyi qorumaq məqsədinə çatmasına gətirib çıxardı. Bugün Azərbaycan Silahlı Qüvvələri, modern döyüş texnikası, yüksək təcrübəyə malik hərbi kadrları və inkişaf etmiş müdafiə sənayesi ilə yalnız öz xalqına deyil, bütün dünyaya gücünü və qüdrətini göstərmişdir. 2020-ci il Vətən müharibəsi bu yolun zirvəsi olmuş və Azərbaycan ordusunun gücü bütün dünyaya nümayiş etdirilmişdir. Bu, yalnız bir müharibə qələbəsi deyil, həm də Azərbaycanın güclü orduya sahib olmasının və bu ordunun gücünü düzgün idarə etməsinin təntənəsidir.
Osmanova Məlahət,
Xəzər rayonu, 92 N-li tam orta məktəbin Tarix müəllimi
