Sentyabrın 15-də Bakı növbəti dəfə mühüm beynəlxalq və mənəvi dialoq mərkəzi kimi dünyanın diqqətini özünə cəlb etdi. Azərbaycan Respublikasının Prezidenti İlham Əliyev Türk Dövlətləri Təşkilatının (TDT) Müsəlman Dini Rəhbərləri Şurasının 7-ci toplantısı, Yəhya Bakuvi Beynəlxalq Konfransının həmtəşkilatçıları və Qafqaz Xalqları Ali Dini Şurasının üzvlərindən ibarət nümayəndə heyətini qəbul edərək, ölkəmizin qlobal sülh prosesindəki öncül rolunu bir daha nümayiş etdirdi. TDT-nin Baş katibi, müxtəlif türkdilli dövlətlərin və Şimali Qafqaz respublikalarının ali dini liderlərinin iştirak etdiyi bu mötəbər görüş, Prezident İlham Əliyevin rəhbərliyi ilə Azərbaycanın təkcə iqtisadi və siyasi deyil, həm də İslam və Türk dünyasının mənəvi birliyi istiqamətində həyata keçirdiyi uzaqgörən siyasətin təntənəsidir. Dövlət başçısı bu iki böyük tədbirin eyni vaxtda Bakıda keçirilməsinin rəmzi mənasını xüsusi vurğulayaraq, bunun cəmiyyətlərimiz arasında qardaşlıq əlaqələrini daha da dərinləşdirdiyini bildirdi.
Görüşdə Azərbaycanın bəşəriyyətə bəxş etdiyi zəngin fəlsəfi və mədəni irs geniş müzakirə olundu. Prezident İlham Əliyev dahi mütəfəkkir Seyid Yəhya Bakuvinin həyat və yaradıcılığının bütün İslam aləmi üçün böyük dəyər kəsb etdiyini xatırladaraq, xalqımızın mənəvi potensialının əzəmətini diqqətə çatdırdı. Dövlət başçısı qeyd etdi ki, XII əsrdən başlayaraq Nizami Gəncəvi, Xaqani Şirvani, İmadəddin Nəsimi, Şah İsmayıl Xətai və Məhəmməd Füzuli kimi tarixi şəxsiyyətlərin qoyub getdiyi miras bu günümüz üçün də yolgöstəricidir. Prezident İlham Əliyev Azərbaycanın Qafqaz Albaniyasının və Atabəylər dövlətinin qədim paytaxtları olan Qəbələ və Naxçıvan timsalında həm Türk coğrafiyasının, həm də Qafqazın ayrılmaz bir parçası olduğunu, bu iki böyük sivilizasiyanı özündə birləşdirən qızıl körpü rolunu oynadığını xüsusi olaraq vurğuladı.
İslam dünyasında baş verən mürəkkəb siyasi və ictimai proseslərə toxunan Prezident İlham Əliyev, sülh və birliyin qorunmasında dini liderlərin üzərinə düşən tarixi missiyanı dəyərləndirdi. O bildirdi ki, Azərbaycan İslam həmrəyliyini yalnız bəyanatlarla deyil, atdığı əməli addımlarla dəstəkləyir. 2017-ci ildə Bakıda böyük uğurla keçirilən IV İslam Həmrəylik Oyunlarını böyük birlik bayramı kimi xarakterizə edən dövlət başçısı, gələn il ölkəmizin ev sahibliyi edəcəyi İslam Əməkdaşlıq Təşkilatının Zirvə Görüşünün müsəlman aləmindəki anlaşılmazlıqlara son qoyulması istiqamətində yeni bir ümid işığı olacağını bəyan etdi. Prezident İlham Əliyev vurğuladı ki, İslamı hədəf alan xarici müdaxilələrə qarşı ən güclü silah müsəlmanların vahid bir ailə kimi birləşməsidir.
Dövlət başçısı çıxışının sonunda beynəlxalq nümayəndə heyətinin Qarabağa – Ağdam, Xankəndi, Xocalı və Şuşaya edəcəyi səfərin tarixi əhəmiyyətinə diqqət çəkdi. O, Ermənistanın 30 illik işğalı dövründə 65 məscidin dağıdılmasını və məbədlərdə heyvan saxlanılmasını bütün İslam dünyasına qarşı yönəlmiş misilsiz vəhşilik adlandırdı. Prezident İlham Əliyev qürurla bildirdi ki, Azərbaycan xalqı rəşadətli Ordumuzun gücü ilə bu ədalətsizliyə son qoydu, öz ərazi bütövlüyünü və milli ləyaqətini bərpa etdi. Bu gün “Böyük Qayıdış” proqramı çərçivəsində 90 mindən çox vətəndaşın azad edilmiş torpaqlara qayıtması, Prezident İlham Əliyevin həm qurucu lider, həm də İslam dəyərlərinin qoruyucusu kimi sarsılmaz iradəsini bütün dünyaya sübut edir.
Könül Bəkirova,
YAP Nizami rayon təşkilatının “Heydər Əliyev prospekti, 92a” ərazi partiya təşkilatının sədri
