2025-ci il iyulun 2-də keçirilən mətbuat konfransında Prezident İlham Əliyev Özbəkistanda baş verən dərin və hərtərəfli islahatların diqqətlə izlənildiyini, bu proseslərin Azərbaycanda böyük rəğbətlə qarşılandığını bildirdi. O, Şavkat Mirziyoyevin rəhbərliyi ilə ölkənin keçdiyi inkişaf yolunu “tərəqqi nümunəsi” adlandıraraq, bu sürətli transformasiyanın region üçün ümidverici olduğunu qeyd etdi.
Prezident Əliyev çıxışında vurğuladı ki, Özbəkistanda həyata keçirilən islahatlar yalnız iqtisadi sahə ilə məhdudlaşmır – sosial təminat, təhsil, səhiyyə və idarəçilik sahələrində də geniş dəyişikliklər müşahidə olunur. O, xüsusilə sahibkarlığın təşviqi, rəqəmsallaşma və şəffaflıq prinsiplərinə əsaslanan idarəetmə mexanizmlərinin tətbiqini yüksək qiymətləndirdi.
Azərbaycan Prezidenti bu uğurların təsadüfi deyil, siyasi iradə və düzgün strateji yanaşmanın nəticəsi olduğunu dedi. Onun sözlərinə görə, Özbəkistan xalqı islahatların real nəticələrini gündəlik həyatında hiss edir və bu, ölkə rəhbərliyinə olan inamı daha da möhkəmləndirir. Prezident Əliyev bu inkişaf yolunun dayanıqlı və gələcəyə yönəlik olduğunu xüsusi vurğuladı.
Sonda İlham Əliyev bildirdi ki, Azərbaycan Özbəkistanın qazandığı uğurları qardaş sevincilə qarşılayır və bu inkişafın regionun ümumi sabitliyinə və rifahına töhfə verdiyini düşünür. O, gələcəkdə də Özbəkistanın yüksəlişini yaxından izləməyə və dəstəkləməyə davam edəcəklərini bəyan etdi.
Nigar Cəlalova
YAP Xəzər rayon təşkilatının fəalı
