Dünya Azərbaycanlılarının Həmrəyliyi Günü, xalqımızın milli birlik və azadlıq mübarizəsinin əlamətdar hadisəsi olaraq, 31 dekabr tarixində qeyd edilir. Bu bayramın təsis edilməsi Azərbaycan xalqının tarixi dirçəlişi, milli birliyi və dövlətçilik ənənələrinin təntənəsi kimi qiymətləndirilir. Ümummilli Lider Heydər Əliyevin təşəbbüsü ilə 1991-ci il dekabrın 16-da Naxçıvan Muxtar Respublikası Ali Məclisində bu günün rəsmi bayram kimi qeyd olunması barədə qərar qəbul edildi. Bu hadisə dünya azərbaycanlılarının birlik və həmrəylik ideyasının möhkəmləndirilməsinə xidmət etmişdir.
Dünya Azərbaycanlılarının Həmrəyliyi Günü, dünyanın müxtəlif guşələrində yaşayan milyonlarla soydaşımızın milli-mənəvi varlığını qoruyub saxlaması, müstəqil Azərbaycan Respublikasına olan bağlılıqlarını nümayiş etdirmələri üçün önəmli simvoldur. Ulu öndər Heydər Əliyev qeyd edirdi ki, milli həmrəylik xalqın dilinə, dininə, mədəniyyətinə və ümumbəşəri dəyərlərə hörmət əsasında formalaşır və bu, müstəqil dövlətin ən mühüm dayağıdır.
Həmrəylik günü Azərbaycan diasporu üçün ən əhəmiyyətli bayramlardan birinə çevrilmişdir. Diaspor təşkilatları dünya azərbaycanlılarının birliyini təmin edən ideoloji körpü rolunu oynayır. Ümummilli Lider Heydər Əliyevin rəhbərliyi ilə diasporun təşkilatlanması və güclənməsi istiqamətində böyük addımlar atılmışdır. Bu gün Azərbaycan Respublikasının Diasporla İş üzrə Dövlət Komitəsi və Azərbaycan Diasporuna Dəstək Fondu dünya azərbaycanlılarının hüquqlarını müdafiə edir və onların birliyini təmin edir.
2022-ci ilin 22 aprel tarixində Şuşa şəhərində Dünya Azərbaycanlılarının V Qurultayı – Zəfər Qurultayı keçirildi. Bu tədbir diasporun fəaliyyəti, Qarabağ Zəfəri və milli həmrəyliyə əsaslanan yeni strateji istiqamətlərin müzakirəsi üçün önəmli platforma oldu. Bu kimi qurultaylar və beynəlxalq səviyyəli tədbirlər Azərbaycan diasporunun təşkilatlanmasında və beynəlxalq lobbi fəaliyyətinin genişləndirilməsində mühüm rol oynayır.
Xaricdə yaşayan azərbaycanlıların lobbi siyasəti, Azərbaycanın milli maraqlarını müdafiə etmək və ölkəmizin beynəlxalq arenada mövqeyini gücləndirmək baxımından strateji əhəmiyyət kəsb edir. Azərbaycan Diasporuna Dəstək Fondu diasporun hüquqi və təşkilati fəaliyyətini gücləndirmək üçün müxtəlif layihələr həyata keçirir. Fondun əsas hədəfi dünya azərbaycanlılarının həmrəyliyini daha da gücləndirmək və onların yaşadıqları ölkələrin ictimai-siyasi həyatında fəal rol oynamasını təmin etməkdir.
Dünya Azərbaycanlılarının Həmrəyliyi Günü milli birliyimizin simvoludur. Bu bayram təkcə Azərbaycanın sərhədləri daxilində deyil, bütün dünyada yaşayan soydaşlarımızın ürəklərində milli iftixar hissi yaradır. Azərbaycanın dövlət müstəqilliyi və xalqımızın milli-mənəvi birliyi bu həmrəylik ideyasının əsasında dayanır. Bu gün hər bir azərbaycanlı həm milli kimliyini qoruyur, həm də Azərbaycan Respublikasının inkişafına və beynəlxalq nüfuzunun artmasına töhfə vermək üçün çalışır.
Həmrəyliyimiz daim möhkəm olsun!
Mehriban Hacıyeva,
Bakıxanov qəsəbəsi, 96 nömrəli tam orta məktəbin direktoru
