2023-cü ilin 19–20 sentyabr tarixlərində Azərbaycan Silahlı Qüvvələri tərəfindən Qarabağ bölgəsində lokal xarakterli antiterror tədbirləri həyata keçirildi. Bu əməliyyatın əsas məqsədi bölgədəki qanunsuz erməni silahlı birləşmələrinin tam tərksilah olunması, suverenliyin bərpası və Azərbaycanın konstitusiya quruluşunun təmin edilməsi idi. Əməliyyatın başlamasına səbəb olaraq, həmin gün Azərbaycan ordusunun hərbçilərinin və mülki şəxslərin minaya düşərək həlak olması göstərilir. Hadisə zamanı Xocavənd istiqamətində yol tikinti işləri aparan işçilərin və orada xidmət edən hərbçilərin Ermənistan tərəfindən basdırılmış minaların partlaması nəticəsində həlak olması gərginliyi artırdı. Bu hadisədən sonra Azərbaycan Müdafiə Nazirliyi antiterror tədbirlərinin başladığını elan etdi. Əməliyyatlar çərçivəsində yalnız hərbi obyektlər və qanunsuz silahlı dəstələr hədəfə alındı. Azərbaycan Müdafiə Nazirliyi dəfələrlə bəyan etdi ki, mülki əhalinin təhlükəsizliyi tam şəkildə təmin olunacaq və humanitar qaydalara ciddi şəkildə əməl ediləcək. Əməliyyat zamanı yüksək dəqiqlikli silahlardan istifadə olunması nəticəsində strateji mövqelər ələ keçirildi və qanunsuz silahlı qrupların hərəkət imkanları məhdudlaşdırıldı. Azərbaycan tərəfi əməliyyatın yalnız lokal və məhdud xarakter daşıdığını vurğuladı. Bütün beynəlxalq hüquq normalarına uyğun şəkildə aparılan tədbirlər, Azərbaycanın öz ərazisində suveren hüquqlarını bərpa etməsi kontekstində qiymətləndirildi. Əməliyyatların aparıldığı müddətdə Rusiya Sülhməramlı Kontingenti və Beynəlxalq Qızıl Xaç Komitəsi ilə koordinasiyalı əməkdaşlıq təmin edildi. Əməliyyatın nəticəsi olaraq, 24 saatdan az bir müddətdə separatçı silahlı birləşmələr ağ bayraq qaldıraraq təslim olduqlarını elan etdilər. 20 sentyabr tarixində Azərbaycan Prezidenti İlham Əliyev xalqa müraciət edərək əməliyyatın uğurla başa çatdığını və ölkənin suverenliyinin tam bərpa olunduğunu bildirdi. Bu hadisə, post-münaqişə dövründə Azərbaycanın Qarabağ bölgəsində həyata keçirdiyi ən əhəmiyyətli tədbirlərdən biri oldu. Azərbaycanın məqsədi təkcə hərbi nəzarəti deyil, həm də bölgədə davamlı sülhün və inteqrasiyanın təmin edilməsidir. Əməliyyatlardan sonra Azərbaycan hökuməti Qarabağda yaşayan erməni əsilli vətəndaşların reinteqrasiyası üzrə tədbirlər planını ictimaiyyətə təqdim etdi. Onların hüquqlarının qorunması, sosial rifahının təmin olunması və bərabər vətəndaşlıq prinsipləri əsasında cəmiyyətə inteqrasiya olunması məqsədilə müxtəlif proqramlar işlənib hazırlanır. Beynəlxalq ictimaiyyət hadisəyə müxtəlif mövqelərdən yanaşsa da, bir çox ölkə Azərbaycanın ərazi bütövlüyünə və suverenliyinə dəstək verdiyini bildirdi. Xüsusilə Türkiyə, Pakistan və bir sıra digər müsəlman ölkələri Azərbaycanın haqlı mövqeyini müdafiə etdi. 19–20 sentyabr 2023-cü il tarixli antiterror əməliyyatı Azərbaycan tarixində mühüm dönüş nöqtəsi kimi yadda qaldı. Bu əməliyyatla yalnız hərbi qələbə deyil, həm də dövlət suverenliyinin bərpası və gələcəkdə daha güclü, inteqrasiya olunmuş bir cəmiyyətin qurulması istiqamətində mühüm bir addım atılmış oldu.
Murad Zeynalov
Yeni Azərbaycan Partiyası,Məsləhətçi
