1918-ci ilin 28 may tarixi təkcə Azərbaycanın deyil, bütün müsəlman Şərqinin tarixində dönüş nöqtəsi oldu. Həmin gün Tiflisdə elan edilən Azərbaycan Xalq Cümhuriyyəti, demokratik idarəçilik prinsiplərini əsas tutaraq, Şərqdə ilk parlamentli respublika nümunəsini yaratdı. Bu hadisə yalnız siyasi bir qərar deyil, həm də milli azadlıq və müstəqil düşüncə iradəsinin təcəssümü idi.
Cümhuriyyət cəmi 23 ay fəaliyyət göstərməsinə baxmayaraq, dövlətçilik təməlini möhkəm atdı. Qanunvericilik orqanı – parlament yaradıldı, dövlət atributları – bayraq, gerb və himn təsis edildi, ilk milli ordu quruldu. Qadınlara seçki hüququnun verilməsi isə onu Avropanın bir çox ölkəsindən qabağa çıxardı. Hər bir qərar xalqın iradəsini əks etdirən müasir dövləti formalaşdırmağa xidmət edirdi.
Azərbaycan Xalq Cümhuriyyətinin baniləri – M.Ə.Rəsulzadə, F.X.Xoyski, H.Ə.Ağayev və başqaları milli ideallar uğrunda mübarizə apararaq, xalqın tarixində silinməz iz buraxdılar. Onların uzaqgörən siyasəti nəticəsində xalq öz müqəddəratını sərbəst müəyyənləşdirməyə nail oldu. Həmin dövrün qısa ömrünə baxmayaraq, qoyulan təməllər sonrakı nəsillərə böyük bir miras olaraq qaldı.
Bu gün Azərbaycan dövləti həmin idealları yaşadır və inkişaf etdirir. Hər il qeyd edilən Respublika Günü yalnız tarixi xatırlatmaq üçün deyil, həm də müasir müstəqil dövlətin qürur mənbəyinə çevrilib. 107 il əvvəl atılan bu addım, bu gün qüdrətli və sabit Azərbaycanın ideoloji başlanğıcıdır.
Nigar Cəlalova,
YAP Xəzər rayon təşkilatının fəalı
