“Almaniya Federativ Respublikasının Prezidenti Frank-Valter Ştaynmayerin 2 aprel 2024-cü il tarixində Azərbaycana rəsmi səfəri iki ölkə arasındakı münasibətlərin inkişafında mühüm hadisə oldu. Bu səfər zamanı Azərbaycan Respublikasının Prezidenti İlham Əliyev və Prezident Ştaynmayer arasında aparılan müzakirələr bir sıra strateji məsələləri əhatə edib və ikitərəfli əməkdaşlığın yeni istiqamətlərini müəyyənləşdirib. Bu səfər Almaniya prezidentinin Azərbaycana ilk rəsmi səfəri olmaqla yanaşı, iki ölkə arasında əlaqələrin daha da möhkəmlənməsi üçün yeni imkanlar açıb. Prezident İlham Əliyev səfərin Azərbaycan-Almaniya münasibətlərinə yeni təkan verəcəyinə əminliyini ifadə edib və xüsusilə iqtisadi və enerji sahələrində əməkdaşlığın daha da genişləndirilməsinin vacibliyini vurğulayıb”.
Bunu “Gundemws.az”a açıqlamasında Yeni Azərbaycan Partiyası Nizami rayon təşkilatının sədr müavini Rəşadət Xalıqov deyib.
Rəşadət Xalıqov bildirib ki, səfər zamanı Azərbaycan və Almaniya arasında iqtisadi əlaqələrin daha da inkişaf etdirilməsi müzakirə edilib. Son illərdə iki ölkə arasında ticarət dövriyyəsi əhəmiyyətli dərəcədə artmış və xüsusilə enerji sahəsində tərəfdaşlıq güclənmişdir. 2024-cü ilin ilk iki ayında Azərbaycan-Almaniya ticarət dövriyyəsi təxminən üç dəfə artmışdır. Bunun əsas səbəbi Azərbaycandan Almaniyaya ixrac edilən xam neftin həcminin çoxalmasıdır. Bununla yanaşı, bərpa olunan enerji sahəsində əməkdaşlıq geniş müzakirə olunub. Almaniya şirkətlərinin bu sahədə böyük təcrübəsi olduğu üçün Azərbaycan 2030-cu ilə qədər bərpa olunan enerji istehsal gücünü 6 giqavata çatdırmağı planlaşdırır və bu layihələrin həyata keçirilməsində xarici investisiyaların rolu böyük olacaqdır.
“Prezident İlham Əliyev görüş zamanı Azərbaycanın 30 il ərzində erməni işğalından əziyyət çəkdiyini və bir milyon azərbaycanlının etnik təmizləməyə məruz qaldığını vurğulayıb. O, beynəlxalq təşkilatların bu işğala qarşı adekvat tədbirlər görmədiyini qeyd edərək Azərbaycanın münaqişəni döyüş meydanında və siyasi platformada həll etdiyini bildirib. Hazırda Azərbaycan və Ermənistan arasında sülh prosesinin intensiv şəkildə davam etdiyi və hər iki tərəfin mövqelərinin bir-birinə yaxınlaşdığı vurğulanıb”. – deyən Rəşadət Xalıqov əlavə edib ki, Almaniya Prezidenti ilə keçirilən görüşdə regional təhlükəsizlik, Avropa İttifaqı və ABŞ-Rusiya münasibətləri kimi qlobal mövzular da müzakirə edilib. Bu görüşün nəticələri həm siyasi, həm də iqtisadi sahədə iki ölkənin qarşılıqlı maraqlarına xidmət edərək gələcək əməkdaşlığın əsas istiqamətlərini müəyyənləşdirib.
