2025-ci il aprel ayının 2-də Azərbaycan Respublikasının Prezidenti İlham Əliyev və Almaniya Federativ Respublikasının Prezidenti Frank-Valter Ştaynmayerin Azərbaycana səfəri çərçivəsində verdikləri bəyanatlar dünya miqyasında iqlim dəyişikliyi və onunla mübarizə məsələlərinin önəmini bir daha gündəmə gətirdi. Hər iki dövlətin rəhbəri, xüsusən də COP29 beynəlxalq iqlim konfransının nəticələrini müsbət qiymətləndirərək, qlobal iqlim siyasətində mühüm irəliləyişlər əldə edildiyini vurğulamışdır. İqlim dəyişikliyi qlobal miqyasda ciddi fəsadlara yol açan bir məsələdir. Havanın istiləşməsi, dəniz səviyyələrinin yüksəlməsi, ekosistemlərdəki pozuntular və təbii fəlakətlərin artması insanlığın qarşısında durduğu ən böyük problemlərdəndir. Azərbaycan və Almaniya prezidentlərinin qeyd etdiyi kimi, bu konfransda bir çox önəmli razılaşmalar imzalanmış, qlobal iqlim siyasətində yeni istiqamətlər müəyyən edilmişdir. Birinci olaraq, konfransda iştirak edən dövlətlər 2030-cu ilə qədər karbon emissiyalarını azaltmaq üçün konkret hədəflər müəyyən etmiş, qlobal istiləşmənin 1.5 dərəcə ilə məhdudlaşdırılmasına dair vəd verərək, bu istiqamətdə əməli addımlar atmağa qərar vermişdirlər. Azərbaycan, xüsusilə enerji sektorunda əldə etdiyi yeniliklər və təmiz enerji sahəsinə qoyduğu investisiyalarla bu hədəflərin həyata keçirilməsində aktiv iştirakını nümayiş etdirmişdir. Prezident İlham Əliyev, ölkənin karbon tullantılarının azaldılması və bərpa olunan enerji mənbələrinin istifadəsinin artırılması istiqamətində ciddi təşəbbüslərini qeyd etmişdir. Azərbaycanın iqlim dəyişikliyi ilə mübarizədəki rolu, ölkənin enerji siyasətinin dəyişməsi ilə daha da önə çıxır. 2020-ci ildən etibarən Azərbaycanda “Yaşıl enerji” strategiyasının tətbiqi və bərpa olunan enerji mənbələrinin istifadəsinin artırılması ölkənin iqlim siyasətindəki fəallığını artırmışdır. COP29-da alınan qərarlarla əlaqəli olaraq, Azərbaycan, Almaniya ilə birlikdə qlobal iqlim siyasətinin təkmilləşdirilməsi və enerjinin dayanıqlı istifadəsi sahəsində əməkdaşlığını genişləndirmək niyyətində olduğunu açıqlamışdır. Prezident İlham Əliyev, həmçinin Azərbaycanın müxtəlif beynəlxalq platformalarda iqlim dəyişikliyi ilə bağlı apardığı təşəbbüsləri daha da irəlilətmək məqsədilə, “yaşıl” iqtisadiyyatın inkişafını prioritetlərdən biri kimi müəyyən etmişdir. Ölkənin su resurslarının qorunması, ətraf mühitin təmizlənməsi və karbon emissiyalarının azaldılması istiqamətində bir çox mühüm layihələr həyata keçirilmişdir. COP29 konfransı, dünya miqyasında iqlim siyasətinin daha da güclənməsini və daha konkret addımların atılmasını təmin etmişdir. Azərbaycan və Almaniya prezidentlərinin verdikləri bəyanatlar, hər iki ölkənin bu sahədəki fəallığını və gələcəkdəki əməkdaşlıqlarını vurğulamışdır. Gələcəkdə, ölkələr arasında daha çox birgə layihələr və təşəbbüslər həyata keçirilməsi, qlobal iqlim dəyişikliyi ilə mübarizədə müsbət nəticələrin əldə edilməsini təmin edə bilər. Bu, yalnız Azərbaycan və Almaniya üçün deyil, eyni zamanda bütün dünya üçün mühüm bir addım olacaqdır. COP29-un nəticələri, həm də gələcəkdəki iqlim konfranslarında daha geniş və təsirli əməkdaşlıqların qurulmasına yol açacaq və bu prosesdə Azərbaycan və Almaniyanın liderliyi daha da möhkəmlənəcəkdir.
Siyasət Həsənov,
YAP Xəzər rayon təşkilatının məsləhətçisi
