Almaniya Federativ Respublikası Azərbaycan Respublikasının müstəqilliyini 12 yanvar 1992-ci il tarixində tanımışdır. İki ölkə arasında diplomatik münasibətlər 20 fevral 1992-ci il tarixində qurulmuşdur. Azərbaycanın Almaniyada Səfirliyi 2 sentyabr, Almaniyanın Azərbaycanda Səfirliyi 22 sentyabr 1992-ci il tarixində açılmışdır. Azərbaycan və Almaniya arasında davamlı siyasi dialoq mövcuddur, iqtisadiyyat və humanitar sahələrdə geniş əməkdaşlıq həyata keçirilir. Azərbaycan Respublikasının Prezidentinin AFR-ə 17 rəsmi və işgüzar səfəri həyata keçirilmişdir. Baş nazirlərin qarşılıqlı səfərləri çərçivəsində Azərbaycan Respublikasının Baş nazirinin Almaniyaya 1 işgüzar səfəri, Almaniya Federal Kanslerinin Azərbaycan Respublikasına 1 rəsmi səfəri həyata keçirilmişdir. Xarici işlər nazirlərinin qarşılıqlı səfərləri nəticəsində Azərbaycan Respublikasının xarici işlər nazirinin Almaniyaya 14 rəsmi və işgüzar səfəri, Almaniya Federativ Respublikasının xarici işlər nazirinin Azərbaycana 8 rəsmi və işgüzar səfəri həyata keçirilmişdir. Parlamentlərarası əlaqələr də davamlı inkişafdadır. Azərbaycan Respublikası Milli Məclisində Azərbaycan-Almaniyanın parlamentlərarası əlaqələri üzrə Nurlan Həsənovun rəhbərliyi ilə işçi qrupu fəaliyyət göstərir. Almaniya Bundestaqında Xristian-Demokrat İttifaqı partiyasından olan Yohan Davidin sədrlik etdiyi Almaniya-Cənubi Qafqaz parlament qrupu Azərbaycanı da əhatə edir. Azərbaycan Respublikası Milli Məclisi sədrinin Almaniyaya 2 səfəri, Almaniya Bundestaqının vitse-prezidentinin Azərbaycana 1 səfəri həyata keçirilmişdir.
Azərbaycan-Almaniya münasibətlərinin inkişafı sahəsində təşkil edilən belə görüşlərdən biri də Almaniya Federativ Respublikasının Prezidenti Frank-Valter Ştaynmayerin aprelin 2-də Azərbaycana edilən səfəridir. Səfərin təfərrüatları dünya ictimaiyyətinin diqqət mərkəzində idi. Ona görə də Azərbaycan Respublikasının Prezidenti İlham Əliyev Almaniya Federativ Respublikasının Prezidenti Frank-Valter Ştaynmayerlə görüşü barədə mətbuatda bəyanatla çıxış edərək bildirdi ki, bu səfər bizim əlaqələrimizə yeni müsbət təkan verəcəkdir. Həm təkbətək görüşdə söhbət əsnasında, həm də nümayəndə heyətlərinin iştirakı ilə aparılan danışıqlarda Almaniya-Azərbaycan əlaqələrinin gələcək inkişafının müzakirə edildiyini vurğulayan İlham Əliyev qeyd etdi ki, iqtisadi sahədə əldə edilmiş nəticələr bizi, təbii olaraq, ruhlandırır, çünki bu ilin yanvar-fevral aylarında bizim ticarət dövriyyəmiz təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur. Ona görə hesab edilir ki, gələcək illərdə Azərbaycan-Almaniya dövllətləri arasında ticarət dövriyyəsinin şaxələndirilməsi ilə bağlı daha fəal addımlar atılmalıdır, xüsusilə, bərpaolunan enerji sahəsində, çünki Almaniya şirkətlərinin çox böyük təcrübəsi, Azərbaycanın da çox böyük proqramı, planları var. Azərbaycan Respublikası xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindədir və bu, tam realdır, bunun bir hissəsi Avropaya ixrac ediləcəkdir.
İki ölkə arasında indiyə qədər 77 sənəd imzalanmışdır. Ticarət və investisiyalar üzrə Almaniya-Azərbaycan yüksək səviyyəli İşçi Qrup 5 may 2011-ci ildə təsis edilmişdir. İşçi qrupunun Azərbaycan tərəfindən həmsədri iqtisadiyyat nazirinin müavini, Almaniya tərəfdən isə Federal İqtisadiyyat və Enerji Nazirliyinin xarici iqtisadi siyasət idarəsinin baş direktoru Ekhard Frantsdır. İşçi qrupunun indiyədək 9 iclası keçirilmişdir. 1-ci iclas 19-21 oktyabr 2011-ci ildə Berlində, sonuncu 9-cu iclas 10 fevral 2023-cü ildə Berlin şəhərində keçirilmiş, 12 noyabr 2012-ci ildə Bakıda Alman-Azərbaycan Xarici Ticarət Palatası təsis edilmişdir.
Təbii olaraq, görüş əsnasında Azərbaycan-Ermənistan münasibətlərinə də toxunulmuş, bu mövzuda İlham Əliyev Azərbaycan həqiqətlərini bir daha Almaniyanın nümayəndə heyətinə bildirmişdir. Keçən il COP29 beynəlxalq iqlim konfransına ev sahibliyi edən Azərbaycana qeydiyyatdan keçən 197 ölkəni təmsil edən 77 mindən çox iştirakçının gəldiyini deyən İlham Əliyev təəssüflə vurğuladı ki, iştirak etməyən yeganə ölkə Ermənistan olmuşdur. Xüsusilə, indiki şəraitdə – Azərbaycanla Ermənistan arasında normallaşma prosesinin uğurla getdiyi bir zamanda Ermənistan tərəfinin bu beynəlxalq konfransı boykot etməsi əslində başadüşülən və gözlənilən bir addım idi. Çünki haqsız olduğu halda dünya ictimaiyyətinin diqqətini yayındırmaq, həqiqətləri fərqli şəkildə təqdim etmək onların diplomatik elitasının siyasətidir. Halbuki bizim xalqımız etnik təmizləməyə məruz qalmışdır. Bir milyon azərbaycanlı erməni aqressiyasına görə evsiz-eşiksiz qalmış və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz bu tarixi Zəfərimiz sülh danışıqlarına yol açmışdır. Ona görə də bu gün Azərbaycan və Ermənistanın sülhün əldə edilməsində mövqeləri bir-birinə kifayət qədər yaxınlaşmışdır.
Eyni zamanda, görüş zamanı digər beynəlxalq məsələlər də müzakirə edildi, o cümlədən, Amerika-Avropa İttifaqı gərginliyi, Rusiya-Qərb gərginliyi. İkitərəfli münasibətlər tarixində bu, Almaniya Prezidentinin Azərbaycana birinci rəsmi səfəridir. Əminəm ki, səfərin yekunları bizim ölkələrimizi bir-birinə daha yaxın edəcəkdir.
Əliyeva Mehparə,
Xəzər rayonu, 241 saylı tam orta məktəbin müəllimi
