Bildiyimiz kimi, aprelin 2- də Almaniya Federativ Respublikasının Prezidenti Frank-Valter Ştaynmayer Azərbaycana səfəri zamanı iqtisadi məsələlər müzakirə edilmiş, Orta Dəhliz layihəsi və bu layihədə Azərbaycanın rolu, ölkələrimiz arasında enerji sahəsində əməkdaşlıq məsələləri müzakirə edildi, yaşıl enerji ilə bağlı əməkdaşlığa toxunulmuş, COP-29-un Azərbaycanda yüksək səviyyədə təşkil edildiyi və həmin tədbir zamanı iqlim gündəliyi ilə bağlı mühüm nəticələrin əldə olunduğu vurğulamışdır.
Azərbaycanla Almaniya arasında qarşılıqlı münasibətlərin başlanğıcı XIX əsrin ikinci yarısına təsadüf edir. 1863-cü ildə Almaniyanın “Simens qardaşları” firması tərəfindən Gədəbəy ərazisində yerləşən mis yataqları bazasında iri misəritmə zavodları əridilən misin 2/3 hissəsini təşkil edirdi. Bundan əlavə, “Simens qardaşları” firması Daşkəsən ərazisində kobalt yataqları bazasında kobalt zavodu inşa edib. Bu zavodların inşası nəticəsində xeyli sayda insan işlə təmin edilib, əhalinin maddi rifahı yüksəlib. Alman sənayeçilərinin bu ərazidə fəallığının artması nəticəsində ətraf ərazilərdə, xüsusilə Azərbaycanın indiki Göygöl və Şəmkir rayonlarında alman koloniyaları yaranmışdır. XX əsrin 90- cı illərində iki ölkə arasında iqtisadi münasibətlər yeni mərhələyə qədəm qoymuş, iqtisadi və elmi texniki əməkdaşlıq sahəsində müqavilələr imzalanmışdır. Hal-hazırda Azərbaycanda bir çox alman müəssisəsi fəaliyyət göstərir. Bunlardan “Simens”, “Ferrosstal”, “İnterselekt”, “Mersedes Bens” kimi iri şirkətlər Azərbaycanda uğurlu biznes fəaliyyəti göstərirlər. Dövlətimizə əsasən, avtomobillər, dəmir və polad məmulatları, istehsal avadanlıqları gətirilir.
Ulu Öndər Heydər Əliyevin Almaniya səfəri Azərbaycanla Almaniya arasında iqtisadi münasibətlərin inkişafında mühüm rol oynamış, Köln şəhərində AFR-in işgüzar dairələrinin nümayəndələri, iri şirkət rəhbərləri, maliyyə-bank sektorunda çalışan iş adamları ilə görüşüb. O, Azərbaycan iqtisadiyyatının potensial imkanları və beynəlxalq biznes üçün yaradılan şəraitdən bəhs edərək alman iş adamlarını Azərbaycana sərmayə qoymağa çağırıb. Bu səfər Azərbaycana xarici investisiya qoyuluşlarının və beynəlxalq kreditlərin cəlb edilməsində mühüm rol oynayıb. Həmçinin, Prezident İlham Əliyevin Almaniyaya səfəri zamanı Azərbaycana müxtəlif sahələrdə dəstək verməyə hazır olduğunu diqqətə çatdıran xanım Angela Merkel bildirmişdir ki, neft-qaz ölkəsi olan Azərbaycan Almaniya üçün vacib tərəfdaşdır. Dövlət başçımız isə, öz növbəsində, müasirləşmə dövrünü yaşayan Azərbaycanda alman texnologiyalarına tələbat olduğunu, Azərbaycanın Avropanın enerji təhlükəsizliyi məsələlərinin həllinə öz töhfəsini verməyə hazır olduğunu bildirmişdir. Azərbaycanın iqtisadi və turizm potensialının Almaniyada təşviq olunması məqsədilə ölkəmiz hər il Almaniyada keçirilən müxtəlif beynəlxalq sərgilərdə milli stendi ilə iştirak edir.
Müasir dövrdə ölkəmizin iqtisadi gücünün artması bir çox dövlətlərin Azərbaycana olan marağını artırıb. Bu istiqamətdə Avropa dövlətləri Azərbaycanla münasibərlərin genişlənməsinə səy göstərirlər. Avropanın ən çox inkişaf etmiş, kifayət qədər siyasi nüfuza və güclü iqtisadiyyata sahib Almaniya üçün Azərbaycan cəlbedici ölkədir. Belə ki, neft-qaz regionu kimi beynəlxalq layihələrdə mühüm tərəfdaşlardan biridir. Məhz bu baxımdan, iqtisadi, siyasi və mədəni əlaqələrin inkişafı həmişə hər iki respublikanın maraq dairəsindədir.
Yaqublu Şəfiqə,
Xəzər rayonu, 237 nömrəli tam orta məktəbin müəllimi
