Müasir dövrdə informasiya cəmiyyətin hərəkətverici qüvvəsinə çevrilmişdir. Bu səbəbdən mətbuatın rolu təkcə məlumat ötürməkdən ibarət deyil, həm də ictimai şüurun formalaşmasında mühüm vasitəyə çevrilmişdir. Azərbaycanda fəaliyyət göstərən media orqanları bu məsuliyyəti dərk edərək həm çevik, həm də obyektiv şəkildə cəmiyyətə xidmət etməyə çalışırlar. Onların işi, sadəcə hadisələri təqdim etmək yox, eyni zamanda insanları maarifləndirmək, aydın mövqe ortaya qoymaqdır.
Prezident İlham Əliyevin yuxarıda qeyd edilən fikirləri Azərbaycan mətbuatına verilən yüksək dəyərin göstəricisidir. O, medianın operativliyini, qərəzsizliyini və milli maraqlara sadiqliyini vurğulayaraq, bu sahənin inkişaf istiqamətini aydın şəkildə göstərmişdir. Operativlik media üçün sadəcə sürətli xəbərçilik deyil, həm də etibarlı mənbəyə çevrilmək deməkdir.
Azərbaycan mətbuatının bu gün göstərdiyi fəaliyyət həm regionda, həm də beynəlxalq aləmdə nümunəvi xarakter daşıyır. Yerli media qurumları informasiya müharibələri dövründə milli maraqların müdafiəsində müstəsna mövqe tuturlar. Onlar eyni zamanda vətəndaş cəmiyyətinin inkişafına, demokratik düşüncənin möhkəmlənməsinə də mühüm töhfələr verirlər.
Bu baxımdan, ölkədə söz və informasiya azadlığının təmin edilməsi, mətbuatın inkişafı üçün yaradılan hüquqi və texnoloji şərait də diqqətdən kənarda qalmamalıdır. Azərbaycan mətbuatı artıq təkcə informasiya vasitəsi yox, həm də ictimai dəyərlərin daşıyıcısına çevrilmişdir.
Fatimə Axundzadə
YAP Xəzər rayon təşkilatının fəalı
