Prezident İlham Əliyevin 11 avqust 2026-cı ildə Naxçıvana baş tutan 17-ci səfəri muxtar respublikanın inkişaf gündəliyində xüsusi əhəmiyyət daşıyan hadisələrdən biri kimi qiymətləndirilə bilər. Dövlət başçısının özünün də vurğuladığı kimi, Naxçıvana hər səfər konkret nəticələr və yeni təşəbbüslərlə müşayiət olunub. Budəfəki səfər də yalnız müxtəlif layihələrin təqdimatı ilə məhdudlaşmayaraq, Naxçıvanın qarşıdakı illərdə inkişaf istiqamətlərinə dair geniş siyasi və strateji baxış ortaya qoydu.
Səfərin diqqətçəkən tərəflərindən biri Naxçıvanın təhlükəsizlik imkanlarının daha da gücləndirilməsi ilə bağlı məsələlərin ön plana çıxmasıdır. Son illərdə bölgənin müdafiə potensialının artırılması dövlət siyasətinin mühüm istiqamətlərindən biri olub. Prezidentin səfər çərçivəsində səsləndirdiyi fikirlər göstərir ki, Naxçıvanın təhlükəsizliyinin təmin edilməsi yalnız hərbi infrastrukturun inkişafı kimi deyil, həm də regionda sabitliyin qorunmasının vacib elementi kimi nəzərdən keçirilir.
Bununla yanaşı, səfər Naxçıvanın iqtisadi potensialının genişləndirilməsi baxımından da mühüm mesajlarla yadda qaldı. Sənaye, enerji və nəqliyyat sahələrində həyata keçirilən və planlaşdırılan layihələr muxtar respublikanın iqtisadi imkanlarını yeni səviyyəyə çıxarmağa hesablanıb. Xüsusilə Naxçıvanın regional nəqliyyat bağlantılarında rolunun artırılması onun gələcəkdə daha geniş iqtisadi proseslərə inteqrasiyasını sürətləndirə bilər. Bu baxımdan 17-ci səfər yalnız görülən işlərin hesabatı deyil, həm də gələcək inkişaf modelinin konturlarının müəyyənləşdirilməsi kimi xarakterizə olunur.
Prezident İlham Əliyevin Naxçıvana ardıcıl səfərləri dövlət siyasətində bu regiona verilən xüsusi əhəmiyyətin göstəricisidir. 17-ci səfər də Naxçıvanın təhlükəsiz, dayanıqlı və müasir inkişaf edən məkana çevrilməsi istiqamətində həyata keçirilən tədbirlərin davamlı xarakter daşıdığını nümayiş etdirdi. Səfərin ümumi məzmunu göstərir ki, Naxçıvanın gələcəyi həm Azərbaycanın daxili inkişaf strategiyası, həm də Cənubi Qafqazda formalaşan yeni nəqliyyat və iqtisadi reallıqlar kontekstində nəzərdən keçirilir.
Ələkbər Novruzov,
YAP Xəzər RT-ı gənc fəalı
