
Azərbaycan xalqının tarixində elə hadisələr var ki, onların əhəmiyyəti yalnız baş verdiyi dövrlə məhdudlaşmır, gələcək nəsillərin milli yaddaşında da əbədi yaşayır. 2020-ci ildə qazanılmış tarixi Zəfər məhz belə hadisələrdəndir. Bu Qələbə xalqımızın uzun illər davam edən torpaq həsrətinə son qoymaqla yanaşı, Azərbaycanın dövlətçilik tarixində yeni mərhələnin başlanğıcını qoydu. Ağdamın işğaldan azad edilməsi isə həmin möhtəşəm Zəfərin mühüm səhifələrindən birinə çevrildi.
Ağdam Azərbaycanın Qarabağ bölgəsində mühüm strateji, iqtisadi və mədəni əhəmiyyətə malik şəhərlərdən biri olub. Şəhərin işğalı nəticəsində minlərlə insan doğma evindən didərgin düşmüş, tarixi-mədəni irsimiz ciddi zərər görmüşdü. Ağdamlıların yaddaşında doğma torpaqlarına qayıtmaq arzusu illərlə yaşadı. Bu arzu yalnız fərdi istək deyil, bütövlükdə Azərbaycan xalqının milli amalına çevrildi.
44 günlük Vətən müharibəsi xalqımızın birliyini, ordumuzun gücünü və dövlətimizin qətiyyətini bütün dünyaya nümayiş etdirdi. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu işğal altında olan torpaqlarımızın böyük hissəsini azad etdi. Ermənistanın kapitulyasiyası ilə nəticələnən 10 noyabr 2020-ci il tarixli üçtərəfli Bəyanata əsasən, Ağdam rayonu noyabrın 20-də Azərbaycana qaytarıldı. Beləliklə, Ağdamın azadlığı xalqımızın tarixi ədalətin bərpası uğrunda apardığı mübarizənin mühüm nəticəsi oldu.
Şanlı Zəfərin əbədiləşdirilməsi yalnız tarixi hadisələrin qeyd olunması ilə bitmir. Bu, Qələbənin mahiyyətinin, onun uğrunda göstərilən qəhrəmanlığın, şəhidlərimizin fədakarlığının və qazilərimizin şücaətinin gələcək nəsillərə çatdırılması deməkdir. Ağdamda aparılan quruculuq işləri də bu baxımdan xüsusi məna daşıyır. Şəhərin yenidən salınması, tarixi məkanların qorunması, Zəfər tarixinin müxtəlif mədəniyyət və ictimaiyyət layihələri vasitəsilə yaşadılması milli yaddaşımızın möhkəmləndirilməsinə xidmət edir.
Ağdamda Zəfər tarixini yaşadan əsas məqamlardan biri də şəhərin simvolik məkanlarının qorunması və yenidən canlandırılmasıdır. Cümə məscidi, İmarət kompleksi və digər tarixi abidələr şəhərin keçmişi ilə bu günü arasında mənəvi körpü rolunu oynayır. Bu abidələr təkcə memarlıq nümunələri deyil, həm də xalqımızın əsrlər boyu formalaşmış mədəniyyətinin, dini dəyərlərinin və milli kimliyinin göstəricisidir.
Ağdamın azadlığı və sonrakı quruculuq prosesi gənc nəslin vətənpərvərlik ruhunda tərbiyəsində də mühüm əhəmiyyət kəsb edir. Bu gün məktəblilərin, tələbələrin və gənclərin Qarabağa səfərləri, tarixi məkanlarla tanışlığı onlarda milli tarixə bağlılığı gücləndirir. Zəfər haqqında biliklərin yalnız dərsliklərdə deyil, canlı tarixi məkanlarda öyrənilməsi daha təsirli və yaddaqalandır.
Ağdamda yaradılan yeni yaşayış məhəllələri, ictimai məkanlar, mədəniyyət və təhsil obyektləri də Qələbənin gündəlik həyatımıza çevrilməsinin göstəricisidir. Burada qurulan hər bir yeni məktəb, çəkilən hər bir yol, salınan hər bir park azadlığın bəhrələrini nümayiş etdirir. Bu baxımdan Ağdamın müasir inkişafı Zəfərin maddi və mənəvi təcəssümüdür.
Zəfərin əbədiləşdirilməsi şəhidlərin xatirəsinə ehtiramı, müharibə iştirakçılarının qəhrəmanlığının tanıdılmasını və tarixi həqiqətlərin beynəlxalq ictimaiyyətə çatdırılmasını da tələb edir. Ağdamın işğal dövründəki vəziyyəti və azadlıqdan sonrakı dəyişikliklər Azərbaycanın üzləşdiyi faciələrin, eyni zamanda, quruculuq əzminin əyani göstəricisidir.
20 Noyabr – Ağdam Şəhəri Günü bu tarixi yaddaşın yaşadılması baxımından mühüm əhəmiyyət daşıyır. Bu tarix ağdamlılar üçün doğma yurda qayıdış ümidinin gerçəkləşdiyi, bütün Azərbaycan xalqı üçün isə milli birliyin və qətiyyətin təntənəyə çevrildiyi gündür.
Ağdamın hər daşı, hər küçəsi və hər tarixi məkanı bizə Zəfərə aparan yolu xatırladır. Bu şəhərin yenidən qurulan simasında yalnız müasir memarlığı deyil, həm də xalqımızın sarsılmaz iradəsini görürük. Tariximizə sahib çıxmaq, Qələbəmizi qorumaq və onu gələcək nəsillərə ötürmək hər birimizin mənəvi borcudur.
Günay Qəniyeva,
Xəzər rayonunun gənc fəalı, Milli Aviasiya Akademiyasının tələbəsi



