Hüquqi maarifləndirmə cəmiyyət üzvlərinin qanunları, hüquq və vəzifələrini, dövlət institutlarının fəaliyyət prinsiplərini öyrənməsinə imkan yaradır. Azərbaycan Respublikasının Konstitusiyası bu maarifləndirmənin əsas mənbəyidir. Əsas Qanunun müddəalarının geniş şəkildə öyrənilməsi hüquqi mədəniyyətin formalaşmasına xidmət edir.
Vətəndaşların öz hüquqlarını bilməsi onların dövlət və cəmiyyət həyatında daha fəal iştirak etməsinə şərait yaradır. Hüquqi biliklər insanların gündəlik münasibətlərdə düzgün qərarlar qəbul etməsinə, qanuni maraqlarını müdafiə etməsinə və hüquq pozuntularının qarşısını almasına kömək edir.
Konstitusiyanın təhsil müəssisələrində, ictimai təşkilatlarda və müxtəlif maarifləndirici platformalarda təbliği xüsusi əhəmiyyət daşıyır. Gənclərin Əsas Qanunun mahiyyətini öyrənməsi onların dövlətçilik düşüncəsinin və vətəndaş məsuliyyətinin inkişafına müsbət təsir göstərir.
Hüquqi maarifləndirmə yalnız nəzəri biliklərin verilməsi ilə məhdudlaşmamalıdır. İnsanlar hüquqlarının hansı mexanizmlərlə qorunduğunu, dövlət qurumlarına necə müraciət etməli olduqlarını və qanunların gündəlik həyatda necə tətbiq edildiyini də bilməlidirlər.
Konstitusiyanı tanıyan və ona hörmət edən cəmiyyət hüquqi dövlətin möhkəm dayağıdır. Hüquqi maarifləndirmənin genişləndirilməsi qanunun aliliyinin təmin olunmasına, ictimai məsuliyyətin artmasına və dövlət-vətəndaş münasibətlərinin daha sağlam əsaslar üzərində qurulmasına xidmət edir.
Lətifə Əlizadə,
YAP Nizami rayon təşkilatının fəalı
