Azərbaycanın 44 günlük Vətən müharibəsində qazandığı tarixi Zəfər xalqımızın milli iradəsinin, dövlətimizin siyasi qətiyyətinin və ordumuzun hərbi qüdrətinin təntənəsi oldu. Bu qələbə yalnız hərbi uğur kimi deyil, həm də ölkənin ərazi bütövlüyünün bərpasına, milli suverenliyin möhkəmlənməsinə və konstitusion hüquqların təmin olunmasına aparan mühüm tarixi mərhələ kimi qiymətləndirilməlidir. Uzun illər işğal altında qalmış torpaqların azad edilməsi Azərbaycanın dövlətçilik tarixində yeni siyasi reallıq yaratdı.
Müstəqil Azərbaycanın Konstitusiyası dövlətin ərazi bütövlüyünün qorunmasını fundamental prinsip kimi müəyyən edir. Lakin Ermənistanın işğalçılıq siyasəti nəticəsində ölkəmizin ərazilərinin bir hissəsində konstitusion hüquq qaydasının təmin olunması uzun müddət mümkün olmamışdı. Bir milyondan çox azərbaycanlının doğma yurdlarından didərgin salınması onların mülkiyyət, yaşayış yeri seçmək və təhlükəsiz yaşamaq hüquqlarının pozulması ilə nəticələnmişdi. Bu vəziyyət həm humanitar, həm də beynəlxalq hüquqi baxımdan ciddi problem yaradırdı.
Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu 2020-ci il sentyabrın 27-də başlayan Vətən müharibəsində tarixi missiyanı həyata keçirdi. 44 gün davam edən hərbi əməliyyatlar nəticəsində torpaqlarımızın böyük hissəsi işğaldan azad edildi və noyabrın 10-da imzalanmış üçtərəfli bəyanatla hərbi əməliyyatlar dayandırıldı. Bu qələbə Azərbaycanın ərazi bütövlüyünün bərpası istiqamətində həlledici dönüş yaratdı.
2023-cü ilin sentyabrında həyata keçirilmiş antiterror tədbirlərindən sonra Azərbaycanın bütün ərazisində suveren dövlət hakimiyyəti bərpa olundu. Bununla da Konstitusiyanın hüquqi qüvvəsinin ölkənin bütün ərazisində təmin edilməsi üçün tarixi şərait yarandı. İşğal nəticəsində pozulmuş hüquqların bərpası, azad edilmiş ərazilərdə quruculuq işlərinin aparılması və keçmiş məcburi köçkünlərin doğma torpaqlarına qayıdışı dövlət siyasətinin əsas istiqamətlərindən birinə çevrildi.
Zəfər Azərbaycan Konstitusiyasının müəyyən etdiyi ərazi bütövlüyü və suverenlik prinsiplərinin real siyasi nəticələrlə tamamlanması baxımından mühüm əhəmiyyət daşıyır. Bu qələbə xalqımızın milli birliyini gücləndirdi, dövlətin beynəlxalq mövqelərini möhkəmləndirdi və gələcək inkişaf üçün yeni imkanlar yaratdı. Bu gün Azərbaycanın qarşısında duran əsas vəzifələrdən biri qazanılmış tarixi nailiyyətləri davamlı sülhə, iqtisadi tərəqqiyə və hüquqi dövlət quruculuğuna çevirməkdir.
Ceyhun Qafarov,
YAP Nizami rayon təşkilatının “Elşən Süleymanov küçəsi, 25/14” ərazi partiya təşkilatının sədr müavini
