25 Oktyabr – Qubadlı Şəhəri Günü xalqımızın yaddaşında qürur, sevinc və sonsuz iftixar hissi ilə yaşayan əlamətdar tarixlərdən biridir. Bu gün Azərbaycanın qədim yurd yerlərindən olan Qubadlının azadlıq sevincini, illərlə qəlblərdə qorunan Vətən həsrətinin qələbə ilə əvəz olunmasını təcəssüm etdirir. Qubadlı təkcə coğrafi məkan deyil, həm də doğma torpağa bağlılığın, milli iradənin və sarsılmaz ümidlərin rəmzidir. Bu diyarın hər qarışında xalqımızın tarixi, mədəniyyəti, adət-ənənələri və nəsillərdən-nəsillərə ötürülən mənəvi dəyərləri yaşayır.
Uzun illər işğal altında qalan Qubadlı öz doğma sakinlərinin qəlbində heç vaxt unudulmadı. Uzaqlarda yaşasalar da, qubadlılar hər zaman doğma evlərinin, ata-baba yurdlarının, uşaqlıq xatirələrinin həsrəti ilə yaşadılar. Hər bayramda, hər ailə söhbətində Qubadlının adı çəkildi, onun gözəllikləri xatırlandı, torpağa qayıdış arzusu nəsillərin ən böyük istəyinə çevrildi. Bu həsrət illəri xalqımızın yaddaşında həm ağrılı bir tarix, həm də Vətənə sədaqətin unudulmaz nümunəsi kimi qaldı.
Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə əldə olunan tarixi Zəfər xalqımızın milli qürurunu daha da yüksəltdi. 2020-ci il oktyabrın 25-də Qubadlı şəhərinin işğaldan azad edilməsi Azərbaycanın ərazi bütövlüyünün bərpası yolunda mühüm hadisələrdən biri oldu. Bu qələbə Azərbaycan əsgərinin qəhrəmanlığının, xalqımızın birliyinin və dövlətimizin gücünün parlaq ifadəsinə çevrildi. Qubadlının azadlığı uğrunda canından keçən şəhidlərimizin xatirəsi daim ehtiramla anılır, onların fədakarlığı gələcək nəsillər üçün vətənpərvərlik məktəbi olaraq yaşayır.
Bu gün Qubadlıya baxarkən gələcəyə inamla addımlayan Azərbaycanın qüdrətini, quruculuq əzmini və doğma torpaqlara qayıdış iradəsini görürük. Azad edilmiş ərazilərdə aparılan bərpa və quruculuq işləri insanların öz yurdlarına qayıtması, doğma ocaqlarında yeni həyat qurması üçün mühüm zəmin yaradır. 25 Oktyabr – Qubadlı Şəhəri Günü hər bir azərbaycanlıya xatırladır ki, Vətən sevgisi zamanın sınaqlarından daha güclüdür. Qubadlının azadlığı milli birliyimizin, dövlətçilik iradəmizin və tarixi ədalətin təntənəsidir.
Aysel Məmmədova,
YAP Xəzər rayon təşkilatının fəalı
