Azərbaycan xalqının tarixində elə hadisələr var ki, onların əhəmiyyəti müəyyən bir zaman çərçivəsini aşaraq milli yaddaşın ayrılmaz hissəsinə çevrilir. Füzuli şəhərinin 17 oktyabr 2020-ci ildə işğaldan azad edilməsi də belə hadisələrdəndir. Bu qələbə xalqımızın torpaq sevgisinin, milli birliyinin və müstəqil dövlət quruculuğu yolunda nümayiş etdirdiyi qətiyyətin parlaq təzahürü oldu. 17 Oktyabr – Füzuli Şəhəri Günü hər il bizə xatırladır ki, Vətən torpağı yalnız coğrafi məkan deyil, həm də tariximiz, kimliyimiz, xatirələrimiz və gələcək nəsillərə ötürdüyümüz müqəddəs mirasdır.
Füzulinin azadlığına aparan yol böyük fədakarlıqlar, ağır sınaqlar və misilsiz qəhrəmanlıqlarla yadda qaldı. Azərbaycan əsgəri Vətənin hər qarışını qorumaq əzmi ilə döyüşərək düşmən üzərində tarixi qələbənin əldə olunmasına öz töhfəsini verdi. Bu mübarizədə xalqın birliyi, arxa cəbhədə göstərilən dəstək və dövlətimizin qətiyyətli siyasəti mühüm rol oynadı. Şəhidlərimizin fədakarlığı, qazilərimizin döyüş ruhu və əsgərlərimizin cəsarəti Füzulinin azadlıq salnaməsini yaratdı. Onların xidmətləri qarşısında hər birimizin mənəvi borcu bu tarixi unutmamaq və Vətənə sədaqət ənənəsini yaşatmaqdır.
Bu gün Füzulidə həyata keçirilən bərpa və inkişaf tədbirləri milli birliyin quruculuq gücünə çevrildiyini göstərir. Şəhərin yenilənməsi, nəqliyyat əlaqələrinin inkişafı, yeni yaşayış sahələrinin yaradılması və sosial infrastrukturun qurulması gələcək üçün geniş imkanlar açır. Azad edilmiş ərazilərdə aparılan işlər həm də ölkəmizin iqtisadi potensialının güclənməsinə, yeni məşğulluq imkanlarının yaranmasına və insanların doğma torpaqlarında təhlükəsiz həyat sürməsinə xidmət edir. Füzulinin inkişafı Azərbaycanın yalnız keçmişə sahib çıxmadığını, eyni zamanda gələcəyi də böyük məsuliyyətlə qurduğunu sübut edir.
Bu əlamətdar gün münasibətilə xalqımızın birliyinə, dövlətimizin qüdrətinə və Azərbaycan Ordusunun qəhrəmanlığına olan inamımızı bir daha ifadə edirik. Füzuli Şəhəri Günü hər bir vətəndaşı Vətən qarşısında məsuliyyətini dərk etməyə, milli dəyərlərimizi qorumağa və ölkəmizin inkişafına töhfə verməyə səsləyir. Tarixi qələbəmizdən doğan qürur bizi gələcək uğurlara doğru aparan mənəvi qüvvədir. Füzuli azadlığın, həmrəyliyin və milli iradənin təntənəsi kimi daim Azərbaycan xalqının qəlbində yaşayacaqdır.
Orxan İsmayılov,
YAP Xəzər rayon təşkilatının fəalı
