Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin 7-ci Zirvə Toplantısı qlobal ekoloji çağırışlar və yaşıl enerji transformasiyası məsələlərinə xüsusi diqqət yetirilməsi ilə yadda qaldı. Azərbaycan Respublikasının Prezidenti İlham Əliyev çıxışında iqlim dəyişikliklərinə qarşı mübarizənin və bərpaolunan enerji mənbələrinin inkişafının dövlət siyasətinin prioritet istiqaməti olduğunu bildirdi. Müasir dövrdə ekoloji təhlükəsizlik bütün bəşəriyyətin taleyini müəyyən edən həyati vacib məsələyə çevrilmişdir. Azərbaycan neft-qaz ölkəsi olmasına baxmayaraq, yaşıl enerji keçidinə liderlik edən dövlətlər sırasındadır. Ölkəmizin zəngin bərpaolunan enerji potensialı, xüsusilə külək və günəş enerjisi mənbələri gələcək nəsillər üçün təmiz mühit təmin edir.
Prezident İlham Əliyev qeyd etmişdir ki, alternativ enerji layihələrinə qoyulan sərmayələr ölkəmizin dayanıqlı inkişaf strategiyasının tərkib hissəsidir. AQEM məkanında ekoloji əməkdaşlığın genişləndirilməsi iqlim dəyişikliklərinin mənfi təsirlərini yumşaltmağa imkan verir.
Azərbaycan beynəlxalq miqyasda qəbul edilmiş ekoloji sazişlərə və öhdəliklərə tam sadiqdir. Ölkəmizdə həyata keçirilən “Yaşıl dünya naminə həmrəylik ili” tədbirləri və qlobal iqlim konfranslarına ev sahibliyi etməyimiz bu sahədəki qətiyyətimizi göstərir. Dövlət başçısı çıxışında Xəzər dənizindən başlanan yaşıl enerji dəhlizlərinin Avropa və Asiya bazarlarına istiqamətləndirildiyini diqqətə çatdırdı. Yaşıl hidrogen və digər təmiz enerji növlərinin istehsalı gələcəyin iqtisadiyyatını formalaşdıracaqdır. Zirvə toplantısında iştirak edən ölkələr ekoloji təmiz texnologiyaların mübadiləsi və birgə elmi tədqiqatların aparılması barədə razılığa gəldilər.
Azərbaycan ekoloji tarazlığın qorunması məqsədilə meşə zolaqlarının bərpası və su ehtiyatlarından səmərəli istifadə sahəsində mühüm layihələr icra edir. İşğaldan azad edilmiş torpaqlarımız “Yaşıl enerji zonası” elan olunmuşdur və həmin ərazilərdə ən müasir ekoloji standartlar tətbiq edilir. Smart-şəhər və smart-kənd konsepsiyaları əsasında bərpa olunan Qarabağ və Şərqi Zəngəzur ekoloji baxımdan dünyanın ən təmiz bölgələrindən birinə çevrilir. Prezident İlham Əliyev vurğuladı ki, ekoloji təhlükəsizlik məsələlərində regional həmrəylik və birgə səylər zəruridir. Asiya ölkələrinin bir çoxu sürətli sənayeləşmə nəticəsində ekoloji problemlərlə üzləşir və bu baxımdan təcrübə mübadiləsi çox faydalıdır. Azərbaycan hər zaman ekoloji təmiz təşəbbüsləri dəstəkləyir və beynəlxalq platformalarda bu məsələləri fəal şəkildə müdafiə edir.
Zirvə toplantısının qərarları çərçivəsində yaşıl iqtisadiyyata keçidlə bağlı yeni yol xəritələrinin hazırlanması nəzərdə tutulur. Dövlət başçısının çıxışında qeyd olunduğu kimi, təbiətə qayğı ilə yanaşmaq həm də iqtisadi səmərəlilik deməkdir. Enerji səmərəliliyinin artırılması və karbon emissiyalarının azaldılması istiqamətində görülən işlər qlobal miqyasda təqdirəlayiqdir. Azərbaycanın həyata keçirdiyi yaşıl layihələr tərəfdaş dövlətlərdə də böyük maraq doğurur və birgə layihələrin icrasına zəmin yaradır. Zirvə toplantısı ekoloji problemlərin həllində dialoqun və əməkdaşlığın gücləndirilməsi üçün əvəzsiz fürsət yaratdı. Prezident İlham Əliyevin rəhbərliyi ilə Azərbaycan həm ənənəvi enerji təchizatçısı, həm də yaşıl enerjinin əsas ixracatçısı kimi mövqeyini möhkəmləndirir. Ekoloji tarazlığın bərpası bəşəriyyətin xilası deməkdir və Azərbaycan bu missiyaya öncülük edir. Sonda qeyd etmək lazımdır ki, Bakı Zirvə Toplantısı yaşıl enerji və ekologiya sahəsində regional əməkdaşlığın yeni üfüqlərini açdı.
Azərbaycan Prezidenti İlham Əliyev:”Azərbaycan ənənəvi enerji resursları ilə yanaşı, yaşıl enerji layihələrinə də nəhəng sərmayələr yatırır. Azad edilmiş torpaqlarımızın ‘Yaşıl enerji zonası’ elan olunması və həyata keçirdiyimiz ekoloji siyasət bizim gələcəyə sadiqliyimizin bariz nümunəsidir.”
Nərgiz Məmmədova,
Nizami rayonu 210 saylı məktəbin müəllimi
