YAP VIII Qurultayı Azərbaycanın regional əməkdaşlıq siyasətinin yeni mərhələsini siyasi baxımdan qiymətləndirmək üçün mühüm platformadır. Cənubi Qafqazda geosiyasi reallıqların dəyişməsi Azərbaycanı yalnız milli inkişaf deyil, həm də regional iqtisadi əlaqələrin yeni arxitekturasının formalaşması prosesində əsas aktorlardan birinə çevirir. Nəqliyyat, enerji, ticarət və kommunikasiya layihələri ölkənin regional əhəmiyyətini artırır.
Prezident İlham Əliyevin həyata keçirdiyi xarici və iqtisadi siyasətin mühüm xüsusiyyətlərindən biri qarşılıqlı faydaya əsaslanan əməkdaşlıq modelinin təşviqidir. Azərbaycan qonşu dövlətlərlə münasibətlərində nəqliyyat və enerji layihələrindən tutmuş iqtisadi tərəfdaşlığa qədər geniş istiqamətlər üzrə əməkdaşlıq edir. Bu yanaşma ölkənin regional iqtisadi proseslərdə rolunu gücləndirməklə yanaşı, uzunmüddətli sabitliyə də töhfə verir.
Azərbaycanın Şərq-Qərb və Şimal-Cənub nəqliyyat dəhlizlərində fəal iştirakı onun coğrafi mövqeyini strateji üstünlüyə çevirir. Yeni dəmir yolları, avtomobil yolları, liman infrastrukturu və logistika imkanları ölkənin tranzit potensialını genişləndirir. Orta Dəhlizin inkişafı isə Azərbaycanı Asiya ilə Avropa arasında mühüm bağlantı nöqtələrindən birinə çevirən perspektivlər yaradır.
YAP VIII Qurultayı bu imkanların siyasi təşkilatlanma səviyyəsində düzgün qiymətləndirilməsini də zəruri edir. Partiyanın regionlarda fəaliyyət göstərən strukturları yeni iqtisadi layihələrin yerli icmalar üçün yaratdığı imkanları cəmiyyətə izah edə, sahibkarlıq və məşğulluq potensialının artırılmasına töhfə verə bilər. Regional inkişafın sürətlənməsi siyasi sabitliyin və sosial rifahın möhkəmlənməsinə də xidmət edir.
Azərbaycanın regional əməkdaşlıq fəlsəfəsinin əsasını qarşılıqlı maraq, etibarlılıq və uzunmüddətli tərəfdaşlıq təşkil edir. YAP VIII Qurultayı bu prinsiplərin siyasi müstəvidə daha da gücləndirilməsi üçün yeni imkanlar açır. Azərbaycan regional layihələrin təşəbbüskarı və iştirakçısı olmaqla öz iqtisadi imkanlarını genişləndirir, eyni zamanda qonşu ölkələrin inkişaf proseslərinə də töhfə verir.
Tariyel Əkbərov,
YAP Nizami rayon təşkilatının “M.Şərifli küçəsi, 3” ərazi partiya təşkilatının sədri
