Müasir dünyada coğrafi mövqe yalnız xəritədəki koordinatlarla ölçülmür; ölkənin həmin mövqedən hansı iqtisadi imkanlar yarada bilməsi də böyük əhəmiyyət daşıyır. II Azərbaycan Beynəlxalq İnvestisiya Forumu çərçivəsində Prezident İlham Əliyevin çıxışında Azərbaycanın Avropa ilə Asiyanın kəsişməsində yerləşməsinin yaratdığı imkanlara geniş yer verilməsi də bu baxımdan diqqət çəkdi. Son illərdə dəmir yolları, avtomobil yolları, dəniz limanları və hava nəqliyyatı sahəsində yaradılmış infrastruktur Azərbaycanın regional logistika sistemində rolunu artırmaq üçün mühüm baza kimi təqdim edildi.
Çıxışda tranzit imkanlarının reallaşdırılması üçün təkcə daxili infrastrukturun kifayət etmədiyi, qonşu ölkələrlə əməkdaşlığın da vacib olduğu vurğulandı. Azərbaycanın bütün qonşuları ilə nəqliyyat əlaqələrinin inkişaf etdirilməsi regional ticarət və yükdaşımaların genişləndirilməsi üçün mühüm amil kimi göstərildi. Bu yanaşma ölkənin logistika siyasətini yalnız milli sərhədlər daxilində deyil, daha geniş regional sistem çərçivəsində formalaşdırdığını göstərir. Azərbaycanın bu istiqamətdə gördüyü işlər Şərq-Qərb və Mərkəzi Asiya-Avropa bağlantılarında yeni imkanların yaranmasına xidmət edir.
Müasir logistika isə yalnız yolların və dəmir yollarının tikintisi ilə məhdudlaşmır. Rəqəmsal texnologiyalar, gömrük prosedurlarının sürətləndirilməsi, yük axınlarının effektiv idarə edilməsi və məlumat mübadiləsinin təkmilləşdirilməsi də rəqabət qabiliyyətinin mühüm şərtləridir. Prezidentin çıxışında məhz bu məsələlərə toxunularaq fiziki infrastrukturla yanaşı rəqəmsal infrastrukturun və müasir gömrük idarəçiliyinin əhəmiyyəti qeyd edildi. Bu, XXI əsrin nəqliyyat xəritəsində yollar qədər məlumat axınının da əhəmiyyətli olduğunu göstərən yanaşmadır.
Azərbaycanın qarşısında duran məqsəd tranzit imkanlarını daha geniş iqtisadi dəyərə çevirməkdir. Bunun üçün nəqliyyat dəhlizləri ətrafında yeni logistika mərkəzlərinin, xidmətlərin, rəqəmsal həllərin və biznes imkanlarının formalaşması mühüm əhəmiyyət daşıyır. II Azərbaycan Beynəlxalq İnvestisiya Forumunda səslənən fikirlər də göstərdi ki, Azərbaycan öz coğrafi mövqeyini uzunmüddətli iqtisadi strategiyanın tərkib hissəsi kimi nəzərdən keçirir. Bu strategiyada yollar ölkələri birləşdirir, investisiyalar isə həmin bağlantılara iqtisadi məzmun qazandırır.
Asif Dadaşov,
YAP Xəzər rayon təşkilatının fəalı
