Dövlət siyasətinin mərkəzində sülh, multikulturalizm və həmrəylik prinsiplərini əsas tutan Azərbaycan beynəlxalq arenada böyük nüfuza malik etibarlı tərəfdaşdır. Sentyabrın 15-də Prezident İlham Əliyev tərəfindən həyata keçirilən ali qəbul bu mühüm və dəyişməz strateji xəttin ən bariz göstəricisi, məntiqi davamı oldu. Dövlət başçısı Türk Dövlətləri Təşkilatının (TDT) Müsəlman Dini Rəhbərləri Şurasının 7-ci toplantısının iştirakçılarını, Yəhya Bakuvi Beynəlxalq Konfransının təşkilatçılarını və Qafqaz Xalqları Ali Dini Şurasının üzvlərini qəbul edərək regional qardaşlıq və sülh bağlarını daha da yüksək səviyyəyə qaldırdı. Nümayəndə heyətinin tərkibindəki TDT Baş katibinin və çoxsaylı qardaş ölkələrin ali dini rəhbərlərinin, nüfuzlu din xadimlərinin iştirak etməsi ölkəmizin təkcə siyasi müstəvidə deyil, həm də Türk və İslam coğrafiyasının mənəvi birliyinin təmin olunmasında necə böyük və həlledici rol oynadığını bütün aydınlığı ilə nümayiş etdirdi.
Dövlət başçısı öz dərin məzmunlu və əhatəli çıxışında ölkəmizin tarixi və mədəni simasına işıq salaraq, xalqımızın zəngin intellektual irsi ilə daim qürur duyduğunu bildirdi. O, Seyid Yəhya Bakuviyə həsr edilmiş beynəlxalq konfransla dini rəhbərlərin mötəbər Zirvə toplantısının eyni günlərdə Bakıda keçirilməsini Azərbaycanın həm öz şanlı keçmişinə, həm də ortaq dini dəyərlərə olan ehtiramının ali göstəricisi kimi qiymətləndirdi. Nizami, Nəsimi, Xətai və Füzuli kimi böyük dühaların əvəzsiz yaradıcılığının İslam və dünya fəlsəfəsinin ayrılmaz parçası olduğunu vurğulayan Prezident İlham Əliyev, eyni zamanda qədim dövlətçilik tariximizə də xüsusi diqqət ayırdı. O bildirdi ki, Qafqaz Albaniyasının və Atabəylər dövlətinin mövcud olduğu Azərbaycan ərazisi, bu gün TDT daxilində yeganə Qafqaz ölkəsi olaraq həm Qafqazı, həm də Türk dünyasını qırılmaz tellərlə bir-birinə bağlayan sarsılmaz, əbədi bir məkandır.
İslam aləminin birliyi, mənəvi əmin-amanlığı və sarsılmaz həmrəyliyi məsələsi Prezident İlham Əliyevin çıxışının ana xəttini, əsas mahiyyətini təşkil edirdi. O, dini liderlərin öz cəmiyyətlərinə verdiyi sülh, barışıq mesajlarının bölgədə sabitliyin qorunmasındakı əvəzsiz və unikal rolunu qeyd etdi. Azərbaycanın İƏT və digər beynəlxalq təşkilatlar vasitəsilə daim barışdırıcı, ixtilafları aradan qaldıran bir qüvvə kimi çıxış etdiyini deyən dövlət başçısı, IV İslam Həmrəylik Oyunlarının təşkilatçılıq uğurunu ölkəmizin qardaşlıq idealına sadiqliyinin canlı nümunəsi kimi göstərdi. Gələn il Bakıda keçiriləcək İƏT Zirvə Görüşünə böyük inam və ümidlər bəsləyən Prezident İlham Əliyev, müsəlman dövlətləri arasındakı ixtilafların və xaricdən edilən zərərli müdaxilələrin yalnız xalqlarımızın və dövlətlərimizin birliyi, mütləq vəhdəti sayəsində tam aradan qaldırıla biləcəyini qətiyyətlə bəyan etdi.
Tarixi Vətən müharibəsində əldə etdiyimiz parlaq qələbəmiz və işğaldan azad edilmiş ərazilərin genişmiqyaslı dirçəlişi ilə bağlı fikirlər isə görüşün ən qürurverici və təsirli məqamını təşkil etdi. Qonaqların Qarabağa edəcəkləri planlı səfərlə bağlı ətraflı danışan Prezident İlham Əliyev, erməni işğalçılarının 30 il ərzində törətdiyi vandalizmdən, 65 məscidin tamamilə dağıdılması və orada donuz saxlanılaraq həqarət edilməsi hallarından bəhs etdi. Dövlət başçısı bu faktların bütövlükdə İslam dünyasına, bütün müsəlmanlara qarşı törədilən ən böyük cinayətlərdən biri olduğunu xüsusi vurğuladı. Buna rəğmən, qətiyyətlə bildirdi ki, Azərbaycan xalqı məhz öz hərbi qüdrəti, qan-qadası və yenilməz, sarsılmaz iradəsi ilə bu böyük ədalətsizliyə son qoydu. Hazırda Qarabağ və Şərqi Zəngəzurda 90 mindən çox insanın yenidən məskunlaşaraq fəaliyyət göstərməsi isə Müzəffər Azərbaycan dövlətinin quruculuq əzminin və Prezident İlham Əliyevin yenilməz, həlledici siyasətinin şanlı, əbədi rəmzidir.
Elxan İskəndərov,
YAP Nizami rayon təşkilatının “Heydər Əliyev prospekti, 142” ərazi partiya təşkilatının sədr müavini
