Ağdərə Qarabağın coğrafi və iqtisadi baxımdan mühüm ərazilərindən biridir. Onun bərpası bölgənin ümumi inkişaf xəritəsinin tərkib hissəsidir. 20 Sentyabrın Ağdərə şəhəri günü kimi müəyyənləşdirilməsi şəhərin müasir Azərbaycan tarixində xüsusi yerini qeyd edən dövlət qərarlarından biridir.
Ağdərənin gələcək inkişafında infrastruktur əsas istiqamətlərdən biri olacaq. Şəhər və ətraf yaşayış məntəqələri arasında yolların, enerji sistemlərinin, kommunal xətlərin və sosial obyektlərin yaradılması insanların qayıdışı üçün vacib şərtlərdir. Bu baxımdan Ağdərə üzrə bərpa və tikinti işlərinin ayrıca institusional mexanizm çərçivəsində həyata keçirilməsi dövlətin regiona yanaşmasının sistemli xarakter daşıdığını göstərir.
Ağdərənin inkişafı Qarabağın digər şəhərləri ilə qarşılıqlı əlaqədə də nəzərdən keçirilir. Nəqliyyat imkanlarının genişlənməsi, xidmət sahələrinin yaradılması və yaşayış məntəqələrinin bir-biri ilə əlaqələndirilməsi regionun bütöv iqtisadi və sosial sistem kimi formalaşmasına şərait yarada bilər. Bu yanaşma ayrı-ayrı şəhərlərin deyil, bütövlükdə Qarabağın inkişafını nəzərdə tutur.
Ağdərədə aparılan hər bir quruculuq işi gələcəkdə burada məskunlaşacaq insanların həyat şəraitinə təsir göstərəcək. Şəhərin gələcək siması yollar, evlər, məktəblər və sosial obyektlərlə yanaşı, burada yaradılacaq iqtisadi və ictimai həyatla müəyyənləşəcək. Ağdərə də digər Qarabağ şəhərləri kimi keçmişin deyil, Azərbaycanın gələcək inkişaf xəritəsinin mühüm ünvanlarından birinə çevrilir.
Vəfa Bayramova,
YAP Nizami rayon təşkilatının fəal üzvü
