Zəngəzur dəhlizi ideyası Azərbaycanın regionda nəqliyyat və kommunikasiya əlaqələrinin yenidən qurulmasına dair irəli sürdüyü mühüm təşəbbüslərdən biri kimi diqqət çəkir. Bu yanaşma Azərbaycanın əsas hissəsi ilə Naxçıvan arasında birbaşa nəqliyyat bağlantısının formalaşdırılması, eyni zamanda Cənubi Qafqazda yeni kommunikasiya imkanlarının yaradılması məqsədini daşıyır. Müharibədən sonrakı dövrdə bölgədə yaranmış yeni reallıqlar fonunda nəqliyyat xətlərinin açılması məsələsi iqtisadi əməkdaşlığın genişləndirilməsi və uzunmüddətli sabitliyin möhkəmləndirilməsi baxımından xüsusi aktuallıq qazanıb.
Dəhlizin reallaşması ilk növbədə Naxçıvanın Azərbaycanın digər əraziləri ilə daha sıx nəqliyyat əlaqəsinə çıxışını təmin edə bilər. Bu bağlantı sərnişin və yük daşımalarının sürətlənməsi ilə yanaşı, Naxçıvanın regional logistika sistemində rolunun artmasına şərait yaradacaq. Azərbaycan üçün isə bu layihə ölkənin qərb istiqamətində alternativ nəqliyyat marşrutlarına çıxışını genişləndirən və müxtəlif regional yollar arasında əlaqələndirici rol oynayan mühüm infrastruktur xətti kimi qiymətləndirilir.
Zəngəzur dəhlizinin əhəmiyyəti yalnız Azərbaycan-Naxçıvan əlaqəsi ilə məhdudlaşmır. Marşrutun daha geniş nəqliyyat şəbəkəsinə inteqrasiyası Şərq-Qərb istiqamətində yük axınlarının artmasına, Mərkəzi Asiya ilə Avropa arasındakı əlaqələrin şaxələndirilməsinə və region ölkələri arasında ticarət dövriyyəsinin genişlənməsinə imkan yarada bilər. Eyni zamanda yeni kommunikasiyaların açılması Azərbaycan, Türkiyə və digər tərəfdaşlar arasında iqtisadi əlaqələrin daha da dərinləşdirilməsi üçün əlavə imkanlar formalaşdırır.
Bu baxımdan Zəngəzur dəhlizi Azərbaycanın regional nəqliyyat siyasətində uzunmüddətli strateji əhəmiyyətə malik təşəbbüslərdən biridir. Layihənin həyata keçirilməsi regionda yeni iqtisadi əməkdaşlıq imkanlarının yaranmasına, Naxçıvanın tranzit potensialının üzə çıxarılmasına və Azərbaycanın nəqliyyat qovşağı kimi mövqeyinin güclənməsinə xidmət edə bilər. Kommunikasiyaların bərpası ilə bağlı təşəbbüslərin reallaşması Cənubi Qafqazda qarşılıqlı iqtisadi asılılığı artıraraq sülh və sabitliyin möhkəmləndirilməsinə də müsbət təsir göstərə bilər.
Xəyal Rzayev,
YAP Xəzər RT-ı gənc fəalı
