Prezident İlham Əliyevin 11 avqust 2026-cı ildə Naxçıvan Muxtar Respublikasına səfəri çərçivəsində Azərbaycan Televiziyasına verdiyi müsahibə muxtar respublikanın gələcək inkişaf istiqamətlərinə dair mühüm mesajlarla yadda qaldı. Dövlət başçısı Naxçıvana 17-ci səfərinin nəticələrini qiymətləndirərkən son illərdə həyata keçirilmiş layihələrin bölgənin sosial-iqtisadi və təhlükəsizlik baxımından mövqeyini əhəmiyyətli dərəcədə gücləndirdiyini vurğuladı. Müsahibədə Naxçıvanın qarşıdakı mərhələdə yalnız daxili inkişaf baxımından deyil, Azərbaycanın regional və beynəlxalq nəqliyyat, enerji və iqtisadi əlaqələrində daha fəal rol oynayacağına diqqət çəkildi.
Müsahibənin əsas istiqamətlərindən biri Naxçıvanın sənaye və enerji potensialının genişləndirilməsi ilə bağlı oldu. Naxçıvan Sənaye Parkının təməlinin qoyulması yeni istehsal sahələrinin yaradılması və məşğulluğun artırılması baxımından mühüm addım kimi qiymətləndirilə bilər. Park çərçivəsində 300 meqavat gücündə istilik elektrik stansiyasının inşasının nəzərdə tutulması isə muxtar respublikanın enerji təminatını daha da möhkəmləndirməklə yanaşı, gələcəkdə elektrik enerjisi ixracı imkanlarını da genişləndirəcək. Prezidentin fikirlərində Naxçıvanın enerji baxımından artıq yalnız təmin olunan deyil, potensial olaraq ixrac edən bölgəyə çevrilməsi perspektivi xüsusi yer tutdu.
Digər mühüm məsələ Naxçıvanın nəqliyyat imkanlarının genişləndirilməsi və onun beynəlxalq tranzit sistemində mövqeyinin gücləndirilməsidir. Müsahibədə Naxçıvan dəmir yolu xəttinin yeni texniki-iqtisadi əsaslandırma əsasında 194 kilometr uzunluğunda inşa ediləcəyi bildirildi. Bu xəttin Şərq-Qərb və Şimal-Cənub nəqliyyat dəhlizləri ilə əlaqələndirilməsi Naxçıvanın gələcəkdə mühüm logistika mərkəzlərindən birinə çevrilməsi üçün ciddi imkan yaradır. Xüsusilə Zəngəzur dəhlizinin açılması ilə Naxçıvanın Azərbaycan ərazisinin digər hissələri ilə nəqliyyat əlaqələrinin daha da möhkəmlənməsi, eyni zamanda İran və daha geniş coğrafiya ilə yeni iqtisadi bağlantıların formalaşması gözlənilir.
Müsahibədə Naxçıvanın inkişafının yalnız infrastruktur layihələri ilə məhdudlaşmadığı, idarəetmə və institusional dəyişikliklərin də bu prosesin mühüm hissəsi olduğu diqqətə çatdırıldı. Prezident Naxçıvanın muxtar respublika statusunun qorunması şərtilə idarəetmə mexanizmlərinin təkmilləşdirilməsinin vacibliyini qeyd etdi və Qarabağla Şərqi Zəngəzurda tətbiq olunan yeni idarəetmə modelinin üstünlüklərindən danışdı. Beləliklə, 11 avqust müsahibəsi Naxçıvanın təhlükəsizlik, enerji, sənaye, nəqliyyat və idarəetmə sahələrində paralel şəkildə yenilənməsini nəzərdə tutan kompleks yanaşmanı ortaya qoydu. Bu yanaşmanın əsas hədəfi Naxçıvanı daha dayanıqlı, rəqabətqabiliyyətli və regional iqtisadi proseslərdə fəal iştirak edən mərkəzə çevirməkdir.
Kamran Mustafayev,
YAP Xəzər RT-ı gənc fəalı
