Azərbaycan iqtisadiyyatının dayanıqlı inkişafında kənd təsərrüfatı xüsusi əhəmiyyət daşıyan sahələrdən biridir. Son illərdə bu istiqamətdə həyata keçirilən dövlət proqramları, fermerlərə göstərilən dəstək və regionların inkişafına yönəlmiş layihələr aqrar sektorun inkişafını sürətləndirmişdir. Prezident İlham Əliyevin kənd təsərrüfatı məsələlərinə həsr olunmuş müşavirədə etdiyi çıxış da bu sahənin dövlət siyasətində prioritet yer tutduğunu bir daha nümayiş etdirmişdir. Dövlət başçısı çıxışında qeyd etmişdir ki, kənd təsərrüfatının inkişafı həm ərzaq təhlükəsizliyinin təmin olunması, həm də bölgələrdə məşğulluğun artırılması baxımından mühüm rol oynayır. Xüsusilə qeyri-neft sektorunun inkişaf etdirilməsi istiqamətində aqrar sahənin potensialından səmərəli istifadə olunmasının vacibliyi vurğulanmışdır. Prezident bildirib ki, fermerlərin fəaliyyəti üçün əlverişli şərait yaradılması dövlətin əsas məqsədlərindən biridir.
Müşavirədə suvarma sistemlərinin yenilənməsi, torpaq münbitliyinin qorunması və müasir texnologiyaların tətbiqi məsələlərinə də toxunulmuşdur. Bildirilmişdir ki, iqlim dəyişiklikləri və su ehtiyatlarının azalması kənd təsərrüfatı qarşısında yeni çağırışlar yaradır. Buna görə də su resurslarından qənaətlə istifadə olunmalı, yeni suvarma üsulları geniş tətbiq edilməlidir.
Prezident İlham Əliyev kənd təsərrüfatında məhsuldarlığın artırılması üçün subsidiya mexanizmlərinin təkmilləşdirildiyini və texniki təminatın gücləndirildiyini də qeyd etmişdir. Fermerlərin güzəştli kreditlərə çıxış imkanlarının genişləndirilməsi, kənd təsərrüfatı texnikasının yenilənməsi və yerli istehsalın təşviqi istiqamətində görülən işlərin davam etdiriləcəyi diqqətə çatdırılmışdır.
Çıxış zamanı işğaldan azad edilmiş ərazilərdə kənd təsərrüfatının inkişaf perspektivlərinə də xüsusi yer ayrılmışdır. Dövlət başçısı həmin torpaqların yüksək kənd təsərrüfatı potensialına malik olduğunu vurğulayaraq, bu ərazilərdə müasir aqrar infrastrukturun yaradılmasının vacibliyini qeyd etmişdir. Ümumilikdə, müşavirədə səsləndirilən fikirlər Azərbaycanın kənd təsərrüfatının inkişafına dövlət səviyyəsində böyük diqqət göstərildiyini təsdiqləyir. Həyata keçirilən islahatlar və qəbul olunan qərarlar aqrar sektorun daha da güclənməsinə, kənd yerlərində sosial rifahın yüksəlməsinə və ölkənin iqtisadi inkişafına mühüm töhfə verəcəkdir.
Mustafayeva Mətanət,
YAP Nizami rayon təşkilatının fəalı
