Yeni Azərbaycan Partiyasının (YAP) təsis olunması müasir ölkə tarixinin ən mühüm siyasi hadisələrindən biri kimi dəyərləndirilir. 21 noyabr 1992-ci ildə ümummilli lider Heydər Əliyevin rəhbərliyi ilə yaradılan bu partiya, Azərbaycan cəmiyyətində sabitliyin bərqərar olmasına, dövlət quruculuğu prosesinin möhkəmlənməsinə və ölkənin gələcək inkişaf strategiyasının müəyyənləşdirilməsinə böyük töhfələr vermişdir.
XX əsrin sonlarında Azərbaycan siyasi, iqtisadi və sosial baxımdan son dərəcə mürəkkəb dövrlərdən keçir, ölkə dərin böhran və qeyri-sabitliklə üzləşirdi. Belə bir şəraitdə YAP-ın yaradılması xalqın milli birliyinin, idarəetmədə peşəkarlığın və dövlətçilik ənənələrinin bərpası üçün zəruri tarixi addım idi. Partiyanın təsis olunması həm də Azərbaycan cəmiyyətinin sabitliyə, inkişaf və islahatlara olan ümumi tələbatının ifadəsi idi.
Yeni Azərbaycan Partiyası qısa müddət ərzində ölkənin aparıcı siyasi təşkilatına çevrilmiş, dövlət idarəçiliyi sistemində mühüm rol oynamış və Azərbaycanın gələcək inkişaf yolunu formalaşdırmışdır. Ümummilli lider Heydər Əliyevin müəyyən etdiyi siyasi xətt bu gün də Prezident İlham Əliyev tərəfindən uğurla davam etdirilir. Partiyanın fəaliyyəti nəticəsində iqtisadiyyatın dinamik inkişafı, beynəlxalq əlaqələrin genişlənməsi, ölkənin regional və qlobal nüfuzunun artması təmin edilmişdir.
YAP həm siyasi, həm də ictimai platforma kimi dövlətçilik ideyalarının təşviqinə, cəmiyyətin müxtəlif təbəqələri arasında həmrəyliyin gücləndirilməsinə, vətəndaşların sosial rifahının yüksəldilməsinə yönəlmiş geniş proqram və layihələr həyata keçirir. Partiyanın gənclərlə iş strategiyası, qadınların sosial-siyasi aktivliyinin artırılması sahəsində gördüyü tədbirlər müasir Azərbaycan siyasi həyatının mühüm tərkib hissəsidir.
Bu gün Yeni Azərbaycan Partiyasının təsis olunmasının ildönümü, təkcə bir siyasi təşkilatın yaranma tarixi deyil, həm də müasir, güclü və inkişaf edən Azərbaycanın formalaşmasında mühüm mərhələnin rəmzidir. Bu əlamətdar gün partiya üzvləri və bütün vətəndaşlar tərəfindən dövlətçilik naminə fədakar fəaliyyətin, milli həmrəyliyin və vətənə xidmətin bayramı kimi qeyd olunur.
Esmira Əsədova,
YAP-ın gənc fəalı.
