Azərbaycan Respublikası ilə Özbəkistan Respublikası arasında ikitərəfli münasibətlər uzun illərin sınağından çıxmış möhkəm dostluq, qarşılıqlı hörmət və ortaq dəyərlər üzərində qurulub. Prezident İlham Əliyev 2025-ci il iyulun 2-də Şavkat Mirziyoyevlə keçirdiyi birgə mətbuat konfransında bu münasibətlərin sadəcə siyasi yox, həm də mədəni, iqtisadi və mənəvi bağlarla dərinləşdiyini xüsusi olaraq vurğuladı.
İkitərəfli əlaqələrin inkişafında dövlət başçılarının şəxsi dostluğu və siyasi iradəsi mühüm rol oynayır. İmzalanmış sazişlər və keçirilmiş yüksək səviyyəli səfərlər nəticəsində münasibətlər strateji tərəfdaşlıq səviyyəsinə yüksəlib. Hər iki dövlət regional sabitlik və tərəqqi naminə ortaq mövqe nümayiş etdirir, beynəlxalq təşkilatlarda bir-birinin maraqlarını müdafiə edir.
Azərbaycan və Özbəkistan arasında iqtisadi əməkdaşlıq da davamlı şəkildə genişlənir. Ticarət dövriyyəsi artmaqda, sənaye və kənd təsərrüfatı sahələrində birgə layihələr reallaşmaqdadır. Bununla yanaşı, mədəniyyət və təhsil sahəsində qarşılıqlı proqramlar xalqlar arasında mənəvi bağların güclənməsinə şərait yaradır. Tələbə mübadiləsi və ortaq mədəni tədbirlər də ikitərəfli münasibətlərin humanitar əsaslarını möhkəmləndirir.
Sonda Prezident İlham Əliyev iki ölkə arasındakı münasibətləri “sarsılmaz dostluğun və ortaq gələcəyə inamın nümunəsi” adlandıraraq, bu tərəfdaşlığın gələcəkdə daha da dərinləşəcəyinə əminliyini bildirdi. Azərbaycan və Özbəkistan, ortaq tarix və ortaq iradə ilə strateji yolda birgə irəliləyir.
Ağadadaş Həsənalıyev
YAP Xəzər rayon təşkilatının fəalı
