Elm və texnologiyanın sürətlə inkişaf etdiyi bir dövrdə, Azərbaycan və Vyetnam bu sahədə əməkdaşlığı rəsmiləşdirərək gələcəyə yönəlik addım atdılar. 7 may 2025-ci il tarixində imzalanmış Anlaşma Memorandumu rəqəmsal inkişaf, innovasiya, texnologiya və elmi tədqiqat istiqamətlərini əhatə edir. Bu razılaşma tərəflərə birgə startap layihələri yaratmaq, süni intellekt və data təhlili sahələrində təcrübə mübadiləsi aparmaq imkanı verəcək.
Əməkdaşlıq yalnız texnoloji platformalarla məhdudlaşmır. Azərbaycan və Vyetnam arasında bağlanmış digər sənəd – mədəniyyət sahəsində əməkdaşlıq haqqında Anlaşma Memorandumu – iki ölkə arasında humanitar təmasların güclənməsinə yönəlib. Mədəniyyət, incəsənət və irs sahəsində həyata keçiriləcək birgə layihələr, xalqlar arasında qarşılıqlı anlaşmanı daha da möhkəmləndirəcək.
Mədəniyyət Nazirlikləri arasında imzalanan sənəd çərçivəsində qarşılıqlı sərgilər, kino həftələri, folklor festival və akademik mübadilələr nəzərdə tutulur. Bu təşəbbüslər, Azərbaycan və Vyetnamın zəngin mədəni dəyərlərinin beynəlxalq miqyasda tanınmasına da töhfə verəcək. Turizm sahəsində əməkdaşlıq isə iqtisadi əlaqələrə əlavə dinamizm gətirə bilər.
Hər iki sənəd Azərbaycanın həm texnoloji, həm də mədəni potensialını dünyaya tanıtmaq istiqamətində atdığı mühüm addımlar sırasındadır. Elm və mədəniyyətin diplomatik münasibətlərin ayrılmaz hissəsinə çevrilməsi, ölkələr arasında uzunmüddətli və sabit əlaqələrin bünövrəsini formalaşdırır.
Ağadadaş Həsənalıyev
YAP Xəzər rayon təşkilatının fəalı
