Prezident İlham Əliyev və Gürcüstan Prezidenti Mixeil Kavelaşvili Bakıda Strateji Əməkdaşlığı möhkəmləndirən bəyanatlar verdilər.
Əsrlər boyu Azərbaycan və Gürcüstan xalqları sülh, mehribanlıq və qardaşlıq şəraitində yaşamışlar. Bu tarixi dostluq bu gün də davam edir və iki ölkə arasındakı münasibətlər yüksək səviyyədə inkişaf edir. Dövlətlərarası əlaqələr, siyasi dialoq və müntəzəm yüksək səviyyəli təmaslar bu əməkdaşlığın əsasını təşkil edir.
Azərbaycan və Gürcüstan birgə şəkildə bir çox mühüm layihələrə imza atıblar. Xüsusilə enerji və nəqliyyat sahəsində həyata keçirilən layihələr təkcə iki ölkə üçün deyil, həm də daha geniş coğrafiya – o cümlədən Avrasiya və Avropa üçün böyük əhəmiyyət kəsb edir. Azərbaycanın neft və təbii qazının Gürcüstan üzərindən Avropaya daşınması enerji təhlükəsizliyi baxımından vacib amilə çevrilmişdir.
Hazırda Azərbaycan Gürcüstan daxil olmaqla 12 ölkəyə təbii qaz ixrac edir və bu ixracın əsas marşrutu Gürcüstandan keçir. Bununla yanaşı, iki ölkədə inşa edilən dəmir yolları, limanlar və digər nəqliyyat-kommunikasiya infrastrukturları Orta Dəhlizin ayrılmaz hissəsinə çevrilmişdir. Bu dəhliz Avropa ilə Asiyanı birləşdirən mühüm logistika marşrutudur və ildən-ilə bu xətt üzərindən daşınan yüklərin həcmi artır.
Bütün bu uğurlar Azərbaycan və Gürcüstanın qarşılıqlı hörmət və strateji tərəfdaşlıq əsasında qurulan əlaqələrinin nəticəsidir. Bu əməkdaşlıq yalnız regionun inkişafına deyil, həm də qlobal enerji və nəqliyyat xəritəsinin formalaşmasına ciddi töhfə verir.
Cənubi Qafqazda sülhün və sabitliyin təmin olunması Azərbaycan və Gürcüstanın birgə maraqlarına xidmət edir. Hər iki ölkə bu istiqamətdə fəal şəkildə töhfə verir, regionda sabitliyin möhkəmləndirilməsinə çalışır. Təəssüf ki, uzun illər ərzində Cənubi Qafqaz münaqişələr və müharibələrlə yadda qalmışdır. Lakin bu gün ümidlər böyükdür ki, regionun bu qara səhifələri bağlanacaq və sabit, dinc inkişaf dövrü başlayacaq.
Azərbaycan və Gürcüstan arasındakı əlaqələr qarşılıqlı hörmət və strateji tərəfdaşlıq prinsiplərinə əsaslanır. Bu münasibətlər təkcə siyasi və iqtisadi sahələrlə məhdudlaşmır, həm də regionda sabitliyin və əməkdaşlığın gücləndirilməsinə xidmət edir. Gələcəkdə də bu əlaqələrin yüksələn xətlə inkişaf edəcəyi, daha da möhkəmlənəcəyi gözlənilir.
Azərbaycan və Gürcüstanın birgə səyləri, əməkdaşlıq ruhu və ortaq baxışları Cənubi Qafqazın sülh, inkişaf və rifah regionuna çevrilməsi üçün mühüm zəmin yaradır.
Qədim tarixi köklərə malik Azərbaycan-Gürcüstan münasibətləri bu gün strateji tərəfdaşlıq səviyyəsinə yüksəlib. İki ölkə arasında bütün sahələr üzrə – siyasi, iqtisadi, enerji, nəqliyyat, təhlükəsizlik, mədəni-humanitar və digər istiqamətlərdə sıx əməkdaşlıq mövcuddur. Azərbaycan Gürcüstanla əlaqələrə xüsusi önəm verir və bu münasibətlərin daha da dərinləşməsində maraqlıdır.
Xüsusilə enerji və nəqliyyat-logistika sahələrində reallaşdırılan Bakı-Tbilisi-Ceyhan, Cənub Qaz Dəhlizi və Bakı-Tbilisi-Qars kimi layihələr regionun hüdudlarını aşaraq Avropa və Asiyanı birləşdirən strateji bağlantıya çevrilib. Bu layihələr qlobal enerji təhlükəsizliyi və qitələrarası nəqliyyat baxımından müstəsna əhəmiyyət daşıyır.
Azərbaycan-Gürcüstan əlaqələrinin inkişafında XİN-lərarası siyasi məsləhətləşmələr, birgə hökumətlərarası komissiyalar və parlamentlərarası dostluq qrupları mühüm rol oynayır. Beynəlxalq təşkilatlar çərçivəsində – o cümlədən BMT, ATƏT, GUAM və QDİƏT-də iki ölkə bir-birinin mövqeyini daim dəstəkləyir.
İki ölkə arasında yüksək səviyyəli səfərlər də bu əlaqələrin intensivliyini göstərir. Azərbaycan Prezidenti İlham Əliyev müxtəlif illərdə Gürcüstana dövlət, rəsmi və işgüzar səfərlər etmiş, Gürcüstan Prezidenti Salome Zurabişvili isə ölkəmizə rəsmi və işgüzar səfərlərlə təşrif buyurmuşdur. Hökumət və xarici işlər nazirləri səviyyəsində qarşılıqlı səfərlər, eləcə də parlamentlərarası əməkdaşlıq münasibətlərin möhkəm əsaslara söykəndiyini sübut edir.
Bu günədək iki ölkə arasında 119 sənədin imzalanması hüquqi əməkdaşlıq bazasının güclü olduğunu göstərir. Azərbaycan-Gürcüstan əlaqələri həm ikitərəfli, həm də regional və beynəlxalq səviyyədə uğurla inkişaf etməkdədir.
Ülviyyə Fərzalıyeva,
Balaxanı qəsəbəsi, 69 nömrəli tam orta məktəbin ibtidai sinif müəllimi
